‘स्पॉट अॅडमिशन’च्या शिष्यवृत्तीबाबत संभ्रम 

पुणे : राज्यात यापुढे कृषी पदवीसाठी ‘स्पॉट अॅडमिशन’मधून प्रवेश घेणाऱ्या विद्यार्थ्याला शिष्यवृत्ती मिळणार नसल्याचे राज्य शासनाने स्पष्ट केले आहे. मात्र, २०१९-२० पर्यंत प्रवेश घेतलेल्या विद्यार्थ्यांच्या शिष्यवृत्तीबाबत संभ्रम कायम आहे. 

केंद्रिभूत पद्धतीशिवाय प्रवेश घेतलेल्या विद्यार्थ्यांना २०२०-२१ पासून शिष्यवृत्ती मिळणार नाही. शासनाने ही भूमिका अलीकडेच एका बैठकीत पुन्हा स्पष्ट केली. त्यासाठी रिक्त जागेवरील प्रवेश पद्धतीच्या नियमावलीत देखील बदल करण्यात आलेला आहे. 

मुळात कृषी पदवी अभ्यासक्रम चार वर्षांचा असतो. त्यामुळे ‘स्पॉट अॅडमिशन’मधून प्रवेश घेणाऱ्या काही विद्यार्थ्यांना पहिल्या तर काहींना दुसऱ्या वर्षाची शिष्यवृत्ती मिळाली. तिसऱ्या वर्षाच्या विद्यार्थ्यांना देखील काही ठिकाणी शिष्यवृत्ती मिळाली. मात्र २०१९-२० मधील विद्यार्थ्यांना या सुविधेतून वगळले गेले आहे. त्याबाबत शासन स्तरावर अद्याप कोणताही निर्णय झालेला नाही, अशी माहिती सूत्रांनी दिली. 

राज्यात ५१०० विद्यार्थ्यांना या निर्णयाचा फटका बसला असून, दहा कोटी रुपये मंजूर झाल्यास ही समस्या सुटू शकते, असे सूत्रांचे म्हणणे आहे.  ...अन्यथा राज्यभर आंदोलन  प्रलंबित शिष्यवृत्तीबाबत बुधवारी (ता.१७) राष्ट्रीय समाज पक्षाचे पुणे शहराध्यक्ष उमेश कोकरे यांच्या नेतृत्वाखाली काही विद्यार्थ्यांनी महाराष्ट्र कृषी शिक्षण व संशोधन परिषदेसमोर निदर्शने केली. तोडगा न काढल्यास पक्षाचे अध्यक्ष महादेव जानकर यांच्या नेतृत्वाखाली राज्यभर आंदोलन करण्याचा इशारा आंदोलकांनी दिला.