कांदाप्रश्‍नी खासदार चव्हाण यांचे कृषिमंत्र्यांना साकडे

नाशिक : नाशिक जिल्ह्यातील कांदा उत्पादक शेतकऱ्यांना न्याय मिळवून देण्यासाठी दिंडोरीचे खासदार हरिश्चंद्र चव्हाण यांच्याकडून पंतप्रधान नरेंद्र मोदींकडे सततचा पाठपुरावा सुरू आहे. याचाच भाग म्हणून त्यांनी केंद्रीय कृषिमंत्री राधामोहन सिंह यांची नवी दिल्ली येथे नुकतीच भेट घेतली.

गेल्या २० वर्षांपासून कांद्याचा प्रश्‍नाचे व्यवस्थापन होत नसल्याचे चित्र आहे. कांदा दराच्या तेजी-मंदीकडे दीर्घकालीन व्यवस्थापनाची संधी म्हणूनही पाहता येईल, अशी अपेक्षा चव्हाण यांनी व्यक्त केली. तसेच तात्काळ उपाययोजना करण्याची मागणी कृषिमंत्र्यांकडे केली.

किमान दहा वर्षांसाठी कांदा निर्यात धोरण निश्चित करणे, खासगी क्षेत्राच्या साह्याने किमान एक महिन्याच्या सुमारे १२ ते १५ लाख टन संरक्षित कांद्याच्या साठ्याची व्यवस्था करणे, शीतगृहे उभारणे, त्यासाठी अनुदान देणे, महाराष्ट्राखेरीज अन्य राज्यांत शेतकऱ्यांना कांदा चाळींसाठी अनुदान देणे, सूक्ष्मसिंचनासाठी किमान ५० टक्के अनुदान देणे, कांदा निर्यातीसाठी कायमस्वरूपी निर्यात अनुदान निश्चित करणे, अमेरिकेतील कृषी खात्याच्या धर्तीवर मासिक मागणी आणि पुरवठ्याचा अहवाल प्रसिद्ध करणे, देशांतर्गत कांदा लागवड आणि उत्पादनाची आकडेवारी देणारी यंत्रणा सक्षम आणि पारदर्शी करणे आदी मागण्या चव्हाण यांनी सिंह यांच्याकडे केल्या. 

सरकार सकारात्मक कायमस्वरूपी कांदा निर्यात सुरू ठेऊन अनुदान देण्याबाबत सरकार सकारात्मक असल्याचे राधामोहन सिंह यांनी सांगितले. येत्या काही दिवसांत त्याबाबत निर्णय होण्याच्या दृष्टीने काम सुरू असल्याचेही सांगितले. या वेळी नांदगावचे माजी जि. प. सदस्य राजेंद्र पवार, सुदामराव थेटे-पाटील, बापूसाहेब जाधव यांच्यासह शिष्टमंडळ उपस्थित होते.