विदर्भातील दुष्काळाचा कॉँग्रेस करणार अभ्यास

नागपूर  ः दुष्काळाच्या मुद्द्यावर राज्य सरकारची कोंडी करण्याच्या प्रयत्नांतर्गत कॉँग्रेसने विदर्भातील दुष्काळाची माहिती घेण्यासाठी खास समितीचे गठण केले आहे. ही समिती दुष्काळग्रस्त तालुक्‍यांचा दौरा करीत आपला अहवाल कॉँग्रेस प्रदेशाध्यक्षांना सोपविणार आहे. देशासह राज्यात लोकसभा निवडणुकीचे वारे गेले दोन महिने वाहत होते. त्यामुळे विरोधकांसह सत्ताधारी प्रचारात व्यस्त होते. आचारसंहिताही लागू आहे. त्यामुळे दुष्काळी उपाययोजनांकडे दुर्लक्ष झाले. राज्यातील काही भागांत याच कारणामुळे दुष्काळी चित्र चिंताजनक आहे. सरकारकडून घोषणांचा पाऊस पाडण्यात येत असला तरी, प्रत्यक्षात दुष्काळी भागातील जनतेला दिलासा देण्यात सरकार अपयशी ठरल्याची स्थिती आहे. पिण्याच्या पाण्यासाठी सर्वदूर भटकंती सुरू आहे. जनावरांच्या पाणी आणि चाऱ्याचा प्रश्‍नदेखील गंभीर झाला आहे. राज्यातील जनतेची अशा प्रकारे दुष्काळात होरपळ सुरू असल्याने कॉँग्रेसने याच मुद्द्यावर सरकारला घेरण्याची तयारी चालविली आहे.  पक्षाच्या वतीने आता दुष्काळी भागाचे दौरे केले जाणार आहेत. प्रदेशाध्यक्ष अशोक चव्हाण यांनी विदर्भातील दुष्काळाचा अभ्यास करण्यासाठी एक समिती गठित केली आहे. ही समिती तालुक्‍यातील दुष्काळी गावांना भेट देईल. या समितीच्या दौऱ्यात संबंधित जिल्ह्यातील अध्यक्षांना सहभागी करून घेण्याच्या सूचना देण्यात आल्या आहेत. नागरिकांशी संवाद साधत त्यांचे प्रश्‍न ही समिती जाणून घेणार आहे. त्यासोबतच चारा उपलब्धता, चारा छावण्याची स्थिती, पाण्याची उपलब्धता याचाही आढावा समिती घेणार आहे. 

समितीमध्ये आहे यांचा समावेश विदर्भातील दुष्काळीस्थितीचा अभ्यास करण्यासाठी नियुक्‍त समितीचे विधानसभेतील उपनेते आमदार विजय वडेट्टीवार हे अध्यक्ष आहेत. माजी मंत्री वसंत पुरके,, राजेंद्र मुळक, आमदार वीरेंद्र जगताप, रणजित कांबळे, सुनील केदार, राहुल बोंद्रे, अमर काळे, नतीकोद्दीन खतीब, अमित झनक व समिती समन्वयक म्हणून प्रवक्‍ते अतुल लोंढे यांचा समावेश आहे.