सिंधुदुर्ग, रत्नागिरीतील पारंपरिक भातबियाणे लागवडीखाली आणणार

सिंधुदुर्ग: सकस आणि पौष्टिक मानल्या जाणाऱ्या सिंधुदुर्गातील २७ आणि रत्नागिरी जिल्ह्यातील ५ पारंपरिक भातबियाण्यांवर संशोधन करून ते लागवडीखाली आणण्याचा निर्णय फोंडाघाट कृषी संशोधन केंद्रात झालेल्या बैठकीत झाला. याशिवाय दापोली कृषी विद्यापीठाचे कुलगुरू सोबत बैठकीचे आयोजन करण्याचेही निश्‍चित करण्यात आले. पारंपरिक भातबियाणे पुनरूज्जीत करण्याच्या उद्देशाने जिल्ह्यातील काही प्रमुख संशोधक, शेतकऱ्यांची फोंडाघाट( ता.कणकवली) येथील कृषी संशोधन केंद्रात शनिवारी (ता.६) बैठक झाली. या बैठकीला संशोधन केंद्राचे शास्त्रज्ञ डॉ. व्ही.एन. शेट्ये, जिल्हा बँकेचे अध्यक्ष सतीश सांवत, बाएस संस्थेचे डॉ. सचिन चोरगे, भगीरथ प्रतिष्ठानचे डॉ. प्रसाद देवधर, प्रवीण सांवत, शरद धुरी आदी उपस्थित होते.  कुडाळ येथील बाएस संस्थेच्या माध्यमातून सीड बँक स्थापन करण्यात आली आहे. या संस्थेच्या माध्यमातून सिंधुदुर्गातील २७ तर रत्नागिरीतील ५ भात बियाण्यांचे संकलन करण्यात आले आहे. या बियाण्यांमधील सोंफळा, लाल व सफेद वालय, खारा मुनगा, रूची, सोनाक्षी, घाटी पकंज, एलकट, सोरटी ही बियाणे शेतकऱ्यांनी लागवडीखाली आणण्याचे दृष्टीने प्रयत्न करण्याचे बैठकीत निश्‍चित करण्यात आले. यातील काही बियाण्यांवर बाएस मार्फत प्राथमिक संशोधन करण्यात आले आहेत. त्यापैकी काही प्रयोग यशस्वी झाले असून ते शेतकऱ्यांपर्यंत पोहोचविणे आवश्‍यक आहे. पारंपरिक भातबियाणे लोप पावत चालली आहेत. त्यामुळे शेतकऱ्यांना बीजोत्पादन करण्यासाठी देखील प्रोत्साहित करण्यावर भर दिला पाहिजे याविषयी उपस्थित सर्व संशोधक, पदाधिकारी आणि शेतकऱ्यांचे एकमत झाले. श्री. सांवत यांनी ही बैठक कुलगुरूशी चर्चा करून आपण निश्‍चित करू असे सांगतानाच पुढील हंगामांत पारंपरिक भातबियाणे जिल्ह्यातील शेतकऱ्यांना उपलब्ध करून देता येतील अशा पद्धतीने प्रयत्न करूया, असे आवाहन केले.