पुणे जिल्ह्याच्या धरणक्षेत्रात पावसाची संततधार

पुणे ः पुणे जिल्ह्यातील बहुतांशी भागात पावसाचा जोर कायम आहे. जिल्ह्यात अनेक ठिकाणी संततधार पाऊस काही ठिकाणी हलका ते मध्यम स्वरूपाचा आहे. पानशेत धरणाच्या पाणलोट क्षेत्रात १४२ मिलिमीटरची नोंद झाली आहे. त्यामुळे धरणांतील पाणीसाठ्यात हळूहळू वाढ होत आहे.

गुरुवारी (ता. १३) सकाळपर्यंत जिल्ह्यातील २६ धरणांमध्ये जवळपास ९.५० टीएमसी पाणीसाठा उपलब्ध झाला असून एक जूनपासून एकूण ११४.१९ टीएमसी पाणीसाठा आहे. यामध्ये उजनी धरणातील पाण्याचा समावेश आहे. त्यानंतर शुक्रवारी (ता. १४) दिवसभर पश्चिम पट्ट्यातील धरणक्षेत्रात हलका पाऊस चालू होता.

जिल्ह्यात दहा ते बारा दिवसांपासून जिल्ह्याच्या अनेक भागांत पावसाने सुरुवात केली आहे. पश्चिम पट्ट्यातील मावळ, मुळशी, भोर, वेल्हा या तालुक्यांतही पावसाने चांगलीच सुरुवात केली आहे. त्यामुळे या पाणलोट क्षेत्रातील ओढे, नाले खळाळून वाहत होते. येत्या काळात चांगला पाऊस झाल्यास धरणांतील पाणीसाठ्यात आणखी वाढ होण्याची शक्यता आहे. सध्या खडकवासला, कळमोडी, वीर धरणांतून काही प्रमाणात डावा, उजवा कालवा व सांडव्याला पाण्याचा विसर्ग सोडण्यात आला आहे.

जिल्ह्यात झालेल्या जोरदार पावसामुळे भात पिकांना दिलासा मिळत आहे. मावळ, मुळशी, भोर, वेल्हा तालुक्यातील बहुतांशी भागात पाऊस पडला. उत्तरेकडील जुन्नर, आंबेगाव, खेड तालुक्यांतही अनेक ठिकाणी मध्यम स्वरूपाचा पाऊस झाला. तर काही ठिकाणी जोरदार स्वरूपाचा पाऊस पडला. त्यामुळे खरिपातील ज्वारी, तूर, मूग, उडीद, बाजरी, सोयाबीन, मका पिकांना काही प्रमाणात दिलासा मिळाला असून पिके वाढीच्या अवस्थेत आहेत.

शुक्रवारी (ता. १४) सकाळी आठ वाजेपर्यंत धरणातील पाणलोट क्षेत्रात झालेला पाऊस, मिलिमीटरमध्ये ः पानशेत १४२, वरसगाव १३४, मुळशी ११६, टेमघर ११०, गुंजवणी १००, वडिवळे ८०, नीरा देवघर ६८, भाटघर ५७, खडकवासला ४२, कळमोडी ४६, भामाआसखेड ४०, डिंभे, येडगाव ४७, चासकमान ३८, पवना ३९, पिंजळगाव जोगे ३५, आंध्रा ३३,  नाझेर २७, माणिकडोह २४, कासारसाई, वीर २२, वडज २०, उजनी १३.