सिंधुदुर्गात पाऊस सुरूच 

सिंधुदुर्ग: जिल्ह्यात तिसऱ्या दिवशीही मान्सूनपूर्व पाऊस सुरूच आहे. सोमवारी रात्री पावसाच्या सरी कोसळत होत्या. तर मंगळवारी सकाळपासून जिल्ह्यात रिमझिम पाऊस सुरू असून अधूनमधून पावसाच्या मोठ्या सरी कोसळत आहेत. किनारपट्टीसह संपूर्ण जिल्ह्याला चक्रीवादळाच्या शक्यतेने सतर्कतेचा इशारा दिला असून एनडीआरएफची तुकडी तैनात ठेवण्यात आली आहे. 

सिंधुदुर्गात गेल्या दोन दिवसांपासून मान्सूनपूर्व पावसाच्या सरी कोसळत आहेत. सुरूवातीला विजांच्या कडकडाटासह कोसळलेला पाऊस आता मान्सूनप्रमाणे कोसळत आहे. सोमवारी रात्रभर रिमझिम पाऊस तर कधी पावसाच्या मोठ्या सरी कोसळत होत्या. पावसामुळे हवेतील उष्मा नाहीसा झाला असून हवेत गारवा निर्माण झाला आहे. शेतकरी पेरणीच्या तयारीला लागले आहेत. 

हवामान खात्याने ३ जूनला चक्रीवादळाची शक्यता वर्तविल्यामुळे जिल्हा प्रशासनाने जिल्ह्यात सतर्कतेचा इशारा दिला आहे. मच्छीमार बांधवांनी समुद्रात उतरू नये. याशिवाय आपआपल्या नौका किनाऱ्याला सुरक्षित स्थळी ठेवाव्यात अशा सूचना दिल्या आहेत. ज्यांची घरे मजबूत नसतील त्यांनी सुरक्षित स्थळी जावे. घराच्या आजूबाजूला झाडे असतील तर त्यांनीही सुरक्षित ठिकाणी राहावे. यादिवशी विनाकारण कुणीही घराबाहेर पडू नये, या कालावधीत वीज पुरवठा खंडीत होणे असे प्रकार घडू शकतात. त्यामुळे आपआपल्या घरांमध्ये दिव्यांची व्यवस्था करावी, असे आवाहन देखील प्रशासनाकडून करण्यात आले आहे.