कोरोना रोखण्यासाठी नागरिकांनी प्रशासनास सहकार्य करावे : कृषिमंत्री

मालेगाव, जि. नाशिक : कोरोना विषाणूचा प्रादुर्भाव रोखण्यासाठी नागरिकांनी स्वयंशिस्त पाळत प्रशासनास सहकार्य करावे, असे आवाहन राज्याचे कृषिमंत्री दादा भुसे यांनी येथे केले. मालेगाव येथील शासकीय विश्रामगृहात मंत्री भुसे यांच्या उपस्थितीत शुक्रवार (ता. २०) दुपारी महसूल, पोलिस, महानगरपालिका प्रशासनाची आढावा बैठक आयोजित करण्यात आली होती. या वेळी ते बोलत होते. या वेळी महानगरपालिकेचे आयुक्त किशोर बोर्डे, अपर पोलिस अधीक्षक संदीप घुगे, उपविभागीय अधिकारी डॉ. विजयानंद शर्मा, तहसीलदार चंद्रजित राजपूत, महानगरपालिकेचे उपायुक्त नितीन कापडणीस, साहाय्यक उपायुक्त राहुल मर्ढेकर आदी उपस्थित होते. मंत्री भुसे यांनी म्हणाले, की कोरोना विषाणूचा प्रादुर्भाव रोखण्यासाठी विविध उपाययोजना करण्यात येत आहेत. या उपाययोजनांना नागरिकांनी सकारात्मक प्रतिसाद द्यावा. नागरिकांनी शहरात गर्दी करू नये. परदेशातून आलेल्या नागरिकांची माहिती तत्काळ प्रशासनास द्यावी. रविवारी देशाचे प्रधानमंत्री नरेंद्र मोदी यांनी ‘जनता कर्फ्यू’ पाळण्याचे आवाहन केले आहे. या आवाहनास नागरिकांनी प्रतिसाद द्यावा. नागरिकांनी घराबाहेर पडू नये. उपविभागीय अधिकारी डॉ. शर्मा यांनी म्हणाले, की जिल्हाधिकारी सूरज मांढरे यांच्या आदेशान्वये शहरातील गर्दी होणारे हॉटेल, लॉन्स, मंगल कार्यालये, रात्री उशिरापर्यंत सुरू राहणारी चहाची हॉटेल, चित्रपटगृहे आदी सर्व ठिकाणे बंद करण्यात येणार आहेत. वरील ठिकाणी निरीक्षणासाठी भरारी पथकांची नेमणूक करण्यात येणार आहे. या पथकात पाच ते सहा जणांचा समावेश असेल. मालेगाव शहरातील सर्व पान दुकाने बंद करण्यात आलेली आहेत. नागरिकांनी नियमांचे उल्लंघन होणार नाही याची दक्षता घ्यावी. अन्यथा संबंधितांवर कायदेशीर कारवाई करण्यात येईल. उपविभागीय अधिकारी कार्यालयात सुरू असलेले सेतू केंद्रही बंद करण्यात आले आहे.