सहकार विकास महामंडळाला शेअर्स विक्रीतून सक्षम करणार

सोलापूर : "सहकारी पतसंस्थांना भविष्यात आर्थिक मदत करणे, विकास सोसायट्यांचे सक्षमीकरण करणे, अडचणीतील पतसंस्थांना आर्थिक पाठबळ देणे आणि राज्यातील सहकार समृद्ध करण्याकरिता महाराष्ट्र सहकार विकास महामंडळ सक्षम करणे आदींसाठी शेअर्स विक्री करून महामंडळाला आर्थिकदृष्ट्या सक्षम केले जाईल,''अशी माहिती राज्याचे सहकारमंत्री सुभाष देशमुख यांनी रविवारी (ता. १२) दिली.

महाराष्ट्र सहकारी विकास महामंडळाची सभा सोलापुरातील शासकीय विश्रामगृहात झाली. त्या वेळी देशमुख बोलत होते. याप्रसंगी महाराष्ट्र सहकारी परिषदेचे अध्यक्ष शेखर चरेगावकर, व्यवस्थापक मिलिंद आकरे, विशेष कार्यकारी अधिकारी संतोष पाटील, जिल्हा उपनिबंधक अविनाश देशमुख, भाजपचे जिल्हाध्यक्ष शहाजी पवार, पतसंस्था फेडरेशनचे जिल्हाध्यक्ष दिलीप पतंगे आदी उपस्थित होते.

देशमुख म्हणाले, "सोलापूर जिल्ह्यातील २४ सहकारी संस्था, पतसंस्थांनी सुमारे सव्वा कोटींचे भाग घेण्याकरिता सहमती दर्शविली आहे. त्यामुळे लवकरच महाराष्ट्रातील अन्य जिल्ह्यांतूनही सहकार विकास महामंडळाच्या शेअर्स विक्रीसाठी प्रयत्न केले जातील. राज्यातील पतसंस्थांमधील ठेवीदारांच्या ठेवींना आता विमा संरक्षण देण्यात येणार आहे. ठेवीदारांच्या पैशाची काळजी घेणे आपले सर्वांचे कर्तव्य आहे. विश्‍वास आणि प्रामाणिकपणावरच हा व्यवहार चालतो. त्यादृष्टीने पतसंस्थांच्या पदाधिकाऱ्यांनी काम करावे. दरम्यान देशमुख यांच्याशी संबंधित संस्थांनी सहकार विकास महामंडळाचे ११ लाखांचे भाग घेतले.

आकरे म्हणाले, "पतसंस्थांच्या आर्थिक सक्षमीकरणाची गरज आहे. त्यासाठी महामंडळाला संस्थांनी मदत द्यावी. त्या माध्यमातून भविष्यात पतसंस्थांनाच आर्थिक साह्य देणे शक्‍य होईल. तसेच विविध उपक्रमांसाठीही हा निधी खर्च करता येईल.’’