सहकारी संस्थांच्या निवडणुका पुन्हा लांबणीवर; ३१ डिसेंबरपर्यंत पुढे ढकलल्या

मुंबई : कोरोना संकटामुळे राज्यातील मुदत संपलेल्या सर्व सहकारी संस्थांच्या निवडणुकांना आणखी तीन महिन्यांची मुदतवाढ देण्यात आली आहे. या निवडणुकांना ही चौथ्यांदा मुदतवाढ मिळाली आहे असून, ३१ डिसेंबरपर्यंत पुढे ढकलण्याचा निर्णय सहकार विभागाने घेतला आहे.

कोरोना विषाणूचा संसर्ग लक्षात घेऊन सहकारी संस्थांच्या निवडणुका ३० सप्टेंबरपर्यंत पुढे ढकलण्याचा निर्णय यापूर्वी घेण्यात आला होता. याच कारणास्तव पुन्हा निवडणुका ३१ डिसेंबर २०२०पर्यंत पुढे ढकलण्याचा निर्णय सोमवारी (ता.२८) सरकारने घेतला आहे.

ज्या जिल्हा मध्यवर्ती बँका आणि प्राथमिक कृषी सहकारी संस्थांच्या निवडणुका जानेवारी ते जून या कालावधीत होऊ घातल्या आहेत. अशा संस्थांच्या संचालकांची मुदत संपण्यापूर्वी या संस्थांची निवडणूक प्रक्रिया पूर्ण करणे आवश्यक असते. कोरोना संकटामुळे राज्यातील अशा मुदत संपलेल्या सर्व सहकारी संस्थांच्या निवडणुकांना आणखी तीन महिन्यांची मुदतवाढ देण्यात आली होती.

याबाबतचे आदेश सरकारने जारी केले. मात्र सर्वोच्च आणि उच्च न्यायालयाने ज्या सहकारी संस्थांच्या निवडणुका घेण्याचे आदेश दिले आहेत. त्यांच्या निवडणुका न्यायालयाच्या आदेशाप्रमाणे होतील, असेही आदेशात म्हटले आहे.

या संस्थांना मुदतवाढ मुदतवाढ मिळालेल्या सहकारी संस्थांमध्ये कोल्हापूर जिल्हा दूध उत्पादक संघासह (गोकूळ), २२ जिल्हा मध्यवर्ती बँका आणि ८ हजार १९४ प्राथमिक कृषी सहकारी संस्थांचा समावेश आहे. जिल्हा बँकांमध्ये पश्चिम महाराष्ट्रातील कोल्हापूर, सांगली, सातारा, नगर आणि मराठवाड्यातल्या उस्मानाबाद, औरंगाबादसारख्या महत्त्वाच्या जिल्हा बँका आहेत.