अमेरिकन लष्करी अळीमुळे मक्याची चाळण

औरंगाबाद : अमेरिकन लष्करी अळीकडून मका पिकाला पोखरण्याचे काम सुरूच आहे. पोंग्यात असलेली अळी आता कणसात घुसली, तर तिचे नियंत्रण कसे करावे, हा प्रश्‍न मका उत्पादकांना पडला आहे. शिवाय, फवारणीचा खर्च तीन ते पाच हजारांपर्यंत करावा लागला. तरीही अळीचे पूर्ण नियंत्रण अजूनही झाले नसल्याची माहिती शेतकऱ्यांनी दिली. 

औरंगाबाद व जालना जिल्हा मका पिकाचे हब मानले जाते. मराठवाड्यात यंदा लागवड झालेल्या २ लाख ४९ हजार २९८ हेक्‍टरवरील मका पिकाच्या क्षेत्रापैकी इतर जिल्ह्यांतील तुरळक लागवड वगळता औरंगाबाद व जालना जिल्ह्यातच मक्याचे सर्वाधिक क्षेत्र आहे. इतरही जिल्ह्यांत कमी-अधिक प्रमाणातील मका पिकावर लष्करी अळीचा मोठ्या प्रमाणात प्रादुर्भाव झाला आहे. तिच्या नियंत्रणासाठी कृषी विभागाकडून व कृषी विद्यापीठाकडून उपाययोजनांसाठी जनजागृती सुरू आहे. मात्र, अळी नियंत्रणात आली नसल्याची स्थिती आहे.

दोन ते तीन फवारण्या केलेल्या क्षेत्रात अजूनही २० ते ३० टक्‍क्‍यांपर्यंत अळीचा प्रादुर्भाव आहे. एकीकडे दुष्काळी स्थिती, अळीचे आक्रमण, त्यामुळे खर्चात वाढ, यामुळे शेतकरी संकटात सापडले आहेत.