‘कोरोना’च्या अफवेमुळे चिकन, मटण विक्री व्यवसाय निम्म्यावर

नागपूर : चीनमध्ये भयावह रूप धारण केलेल्या ‘कोरोना’ व्हायरसच्या अफवेपोटी चिकन, मटण विक्री व्यवसायात कमालीची घट झालेली असून विदर्भात हा व्यवसाय निम्म्यावर आला आहे. शिवाय अंडे विक्रीवरही त्याचा मोठा परिणाम झाला असल्याची माहिती विदर्भ पोल्ट्री असोसिएशनचे अध्यक्ष राजा दुधबडे यांनी दिली.   दुधबडे म्हणाले, ‘‘नागपुरात जवळपास आठवड्यात ३०० किलो चिकनची विक्री होत असे. गेल्या आठवड्यापासून ‘कोरोना’ व्हायरस याबाबत सोशल मीडियावर बऱ्याच अफवा येत आहेत. त्यामुळे या आठवड्यात होलसेल मार्केटमध्ये १५० किलोच चिकनची विक्री झाल्याचे दिसते. व्हायरसच्या अफवांनी आठवड्याला एका शेतकऱ्याला तीन लाखांपर्यंतचे नुकसान होत आहे. स्थानिक बाजारात त्याची किंमत अडीचशे रुपये किलो आजही विकले जाते. अंडे विक्री व्यवसायावरही व्हायरसचा परिणाम दिसून येत आहे. बाजारात प्रति अंडे ३.८० दराने विकावे लागत आहे, असेही ते म्हणाले.