ग्रामीण भागाला कोरोनाचा विळखा 

नाशिक : कोरोनाच्या दुसऱ्या लाटेने शहरांसह ग्रामीण भागालाही मोठा विळखा घातला आहे. लक्षणांकडे केले जाणारे दुर्लक्ष आणि काळजी न घेण्याच्या प्रकारांनी संसर्गाची तीव्रता वाढत आहे. यातील अनेकजण आजार अंगावर काढत असल्याने परिस्थिती हाताबाहेर जात आहे. शहरांतील कोरोनाग्रस्तांची चर्चा होताना दिसते, मात्र ग्रामीण भागाकडे दुर्लक्ष होत असल्याने स्थिती चिंताजनक होत आहे. 

कोरोनाच्या दुसऱ्या लाटेतील विषाणूचे संक्रमण अतिशय जलद होत आहे. ग्रामीण भागात खबरदारीच्या अभावामुळे संसर्ग वाढत आहे. तर कोरोनाची अनाठायी भीती बाळगल्यामुळे काही सौम्य लक्षणे असलेल्या रुग्णांची परिस्थिती गंभीर होऊन मृत्यू होत आहेत. आजारामुळे होणाऱ्या मृत्यूचे प्रमाण एक टक्क्यांपेक्षा कमी आहे. त्यामुळे संवेदनशीलपणे आरोग्य यंत्रणेच्या मार्गदर्शन सूचनांचा अवलंब केल्यास हे संकट टाळता येणार आहे. ‘भिऊ नका, पुढे या अन् वेळीच उपचार घ्या” या पद्धतीने पुढे यावे लागणार आहे. गोंधळून न जाता कोरोनाची लक्षणे समजून घेणे महत्त्वाचे आहे, असे आवाहन आरोग्य विभागाने केले आहे. 

अशी आहेत लक्षणे  कोरडा खोकला, ताप, घसा खवखवणे, श्‍वास घेण्यास त्रास, अंगदुखी, वास न येणे, थकवा ही या आजाराची सामान्य लक्षणे आहेत. काही वेळा उलटी, जुलाब अशी वेगळी लक्षणेही आढळतात. ही लक्षणे दिसून आल्यास दुर्लक्ष करू नका. 

संसर्ग रोखण्यासाठी स्वत: घ्यायची खबरदारी 

खबरदारी घ्या, प्रादुर्भाव टाळा  कुठलीही लक्षणे दिसून आल्यास आशा, अंगणवाडी सेविका, प्राथमिक आरोग्य केंद्र, उपकेंद्र येथे त्वरित संपर्क साधा. ‘ट्रेसिंग, टेस्टिंग व ट्रीटमेंट’ ही त्रिसूत्री पाळा व कोरोना टाळा, असे आवाहन आरोग्य विभाग करत आहे. गरज असल्यास प्रत्येक आरोग्य केंद्रात ‘अँटीजन’ व ‘आरटीपीसीआर’ चाचण्या मोफत, तर खासगी ठिकाणी अनुक्रमे ३०० व ५५० रुपये चाचणीप्रमाणे व्यवस्था आहे. तर पुढील चाचण्या शासकीय दराप्रमाणे होत असल्याने आजाराचे लवकर निदान होईल. वैद्यकीय सल्ल्याने औषधे घ्या. कोरोनाची सौम्य लक्षणे असणारे बहुसंख्य रुग्ण घरच्या घरी बरे होऊ शकतात. याकरिता प्रत्येक रुग्णाला हॉस्पिटलमध्ये भरती करण्याची गरज नाही. गृह विलगीकरणाच्या माध्यमातून रुग्णाची देखभाल घरच्या घरी घेणे शक्य आहे. प्रत्येक रुग्णानुसार हा निर्णय वैद्यकीय सल्ल्यानुसार घ्यावा लागतो. 

गृह विलगीकरणात रुग्णांची अशी घ्या काळजी 

कोविड उपचारासाठी त्रिस्तरीय उपचार सुविधा 

सध्या कोरोनाच्या अनुशंगाने लढाईसदृश परिस्थिती आहे. यात फक्त आरोग्य यंत्रणेवर अवलंबून चालणार नाही. प्रत्येकाने योग्य ती खबरदारी घ्यायला हवी. कोविड कसा होतो, कसा पसरतो. तो टाळण्यासाठी काय काळजी घेतली पाहिजे आणि कोरोना झाला तर काय करायला हवे. निदान-उपचार सुविधा कुठे आहेत. याची पूर्ण माहिती घेऊन त्यानुसार निर्णय घेणे आवश्यक आहे.आजच्या संकटाच्या प्रसंगी छोटी छोटी वाटणारी माहिती हे संकट नाहीसे करण्यासाठी अत्यावश्यक आहे.  -डॉ. प्रदीप आवटे, राज्य सर्वेक्षण अधिकारी, आरोग्य विभाग 

लक्षणे दिसल्यास ताबडतोड आपल्या जवळच्या आरोग्य यंत्रणेशी संपर्क साधा. लक्षणे दिसून आल्यास अंगावर काढू नका, त्वरित वैद्यकीय सल्ला घ्या. घाबरू नका, जागरूक राहा. योग्य वेळीच उपचार केल्याने कोरोना बरा होतो. सकारत्मक दृष्टिकोन ठेवा. आपणही जागरूक राहा, इतरानंही जागरूक करा. या संकटावर मात करूया.  - डॉ. कैलास बाविस्कर, उपसंचालक, राज्य आरोग्य शिक्षण व संपर्क विभाग, पुणे.

ग्रामीण भागात प्रतिबंधकात्मक उपाय कमी...  शहरांच्या तुलनेत ग्रामीण भागात लोकसंख्येची घनता कमी आहे. मात्र कोरोनाचा प्रादुर्भाव शहरी भागांपेक्षा ग्रामीण भागात अधिक वाढतो आहे. ग्रामीण भागात रुग्णांची तपासणी करून त्याला संसर्ग झाला आहे किंवा कसे, हे शोधण्यासाठी किट, मनुष्यबळ हे अत्यंत कमी आहे. शिवाय लोकांमध्ये कोरोनाची भीती आहे, अज्ञान आहे. लोक आजार अंगावर काढतात. तपासणीसाठी जात नाहीत. योग्यवेळी तपासणी होऊन रुग्णाचे विलगीकरण होत नाही. त्याचा परिणाम म्हणून संसर्गित व्यक्ती अनेक लोकांच्या संपर्कात येते आणि प्रत्यक्ष लक्षणे दिसून येण्याअगोदर अनेक लोकांना संसर्गित करते. रुग्ण शोधण्यामध्ये आणि तो विलगीकरण कक्षात नेऊन त्याच्यावर उपचार करण्यामध्ये विलंब होतोय. त्याचा परिणाम म्हणून ग्रामीण भागात कोरोनाचे संकट वाढत आहे. रुग्णांनी बराच आजार अंगावर काढल्यामुळे व उपचार घेण्यास उशीर केल्यामुळे संसर्ग गंभीर होतो आहे. संकट मोठ्या प्रमाणावर वाढत आहे. हे याच मुख्य कारण आहे. त्यामुळे ग्रामीण भागात आजार शोधण्यासाठी आवश्यक असणारे रॅपिड अँटिजन कीट किंवा बाकी तपासण्या लवकरात लवकर होतील. प्राथमिक पातळीवर रुग्ण शोधला जाईल. तो विलगीकरण कक्षात जाईल. त्यावर वेळेवर उपचार होतील, हे केलं तरच ग्रामीण भागात प्रसार रोखता येणार आहे. केवळ लॉकडाउन हा पर्याय नाही.  - डॉ. अजित नवले , सरचिटणीस. किसान सभा