पशुवैद्यकीय महाविद्यालयात आता कोरोना चाचणी 

नागपूर ः पशुवैद्यकीय महाविद्यालयात कोरोना तपासणी प्रयोगशाळेचे उद् घाटन पशुसंवर्धन मंत्री सुनील केदार यांच्या हस्ते करण्यात आले. खासदार डॉ. विकास महात्मे यांची यावेळी उपस्थिती होती.  पशुवैद्यकीय महाविद्यालयातील या प्रयोगशाळेत पशूंपासून मानवांना होणाऱ्या विविध आजारांचे निदान केले जाते. भारतीय कृषी संशोधन परिषदेने दिलेले सेंटर फॉर झोनोसिस कार्यरत आहे. या सेंटरमध्ये लेप्टोपॉरोसिस, टी.बी., स्क्रॅब टॉयफस व क्‍यू फिवर या महत्त्वाच्या आजारांवर संशोधन व निदान केले जाते. ही प्रयोगशाळा अद्ययावत तंत्रज्ञानाने सुसज्ज असून त्यात उच्च तंत्रज्ञानाचा रोगनिदानासाठी वापर केला जातो.  सहा प्राध्यापकांचे पथक येथे कार्यरत आहे. रिअल टाईम पीसीआर चाचणीव्दारे कोविड नमुन्यांची तपासणी केली जाणार आहे. कोरोना संशयितांचे नमुने जलद गतीने तपासण्यासाठी महाराष्ट्र पशू व मत्स्य विज्ञान विद्यापीठ अंतर्गत नागपूर येथील पशुवैद्यकीय महाविद्यालयाच्या प्रयोगशाळेने पुढाकार घेतला आहे. कोरोनाच्या वाढत्या प्रादुर्भावामुळे सामाजिक जाणिवेतून विद्यापीठाने हे सकारात्मक पाऊल उचलले आहे, अशी माहिती कुलगूरू डॉ. आशिष पातूरकर यांनी दिली.  कुलसचिव चंद्रभान पराते, अधिष्ठाता डॉ. ए.पी. सोमकुंवर, संशोधन संचालक डॉ. एन. बी. कुरकुरे, प्रयोगशाळेचे डॉ. संदीप चौधरी, डॉ. वकार खान, डॉ. प्रभाकर टेभूणे, डॉ. शिल्पा शिंदे, डॉ. अर्चना पाटील यांनी चाचण्या करण्यासाठी आवश्‍यक ते प्रशिक्षण घेतले आहे. सोबतच शासकीय वैद्यकीय महाविद्यालयातील कर्मचारीही या कामात मदत करणार आहेत.