कापूस वेचणीचा खर्च सात रुपये प्रतिकिलो

जळगाव ः खानदेशात पावसामुळे पिकांची हानी सुरूच आहे. त्यात वेचणीवर आलेला कापूस घरात आणताना मजूरटंचाईचा मोठा सामना शेतकऱ्यांना करावा लागत आहे. सात रुपये प्रतिकिलो, या दरात कापूस वेचणी शेतकऱ्यांना करून घ्यावी लागत आहे. 

मजूर मिळत नसल्याने इतर गावांमधून मजूर आणावे लागत आहेत. त्यासाठी वाहतूक खर्चही शेतकऱ्यांना द्यावा लागत आहे. जळगाव, चोपडा, जामनेर, धरणगाव, पारोळा, अमळनेर, पाचोरा, भडगाव, यावल, रावेर, धुळ्यातील धुळे, शिंदखेडा आदी सर्वच भागात मजूरटंचाई आहे. जूनच्या पहिल्या आठवड्यात लागवड केलेल्या पूर्वहंगामी कापूस पिकात बोंडे उमलली आहेत. एकाच वेळी वेचणी सर्वत्र सुरू आहे. शिवारात कापसाखालील क्षेत्र आहे.

एकाच वेळी सर्वत्र वेचणी सुरू झाल्याने मजुरांची गरजही वाढली आहे. क्षेत्र वेचणीला अधिक व मजूर कमी अशी स्थिती सर्वत्र आहे. यामुळे मजुरीचे दरही वाढले आहेत. 

शेतकरी वेचणीला आलेला कापूस बेमोसमी पाऊस व इतर समस्यांमुळे शेतात नुकसान होऊन हातचा जाईल, या भीतीने मिळतील, त्या भागातून मजूर आणून वेचणी करून घेत आहेत. यात कापूस वेचणीचा खर्च वाढला आहे. वेचणीचा खर्च पाच रुपये प्रतिकिलोवरून सात रुपये प्रतिकिलो, असा झाला आहे. तर मजुरी १२५ वरून १५० ते १८० रुपये रोज झाली आहे. सकाळी आठ ते दुपारी तीनपर्यंत कामासाठी २०० रुपये द्यावा लागत आहेत. किमान ७०० रुपये मजुरी एक क्विंटल कापूस घरात आणण्यासाठी द्यावी लागत आहे. 

कापूस वेचणीसाठी ‘रोहयो’ राबवा

कापसाचे मध्यंतरी अतिपावसात मोठे नुकसान झाले आहे. असा दुहेरी समस्यांचा सामना यंदा कापूस उत्पादक करीत आहेत. रोजगार हमी योजना तात्पुरत्या स्वरूपात कापूस वेचणीच्या कामासाठी खानदेशात राबवावी, अशी मागणीदेखील पुढे येत आहे. शेतकरी निम्मा खर्च करतील व शासनाने निम्मा खर्च करावा, असा मुद्दाही शेतकरी उपस्थित करीत आहेत.