परभणी जिल्ह्यात लिलावाद्वारे कापूस खरेदी

परभणी : जिल्ह्यातील परभणी, मानवत, सेलू कृषी उत्पन्न बाजार समित्यांमध्ये गुरुवारी (ता.९) जाहीर लिलाव पद्धतीने कापूस खरेदीस सुरवात झाली. पहिल्या दिवशी ४,३२० ते ४,५५५ रुपये प्रतिक्विंटल दर मिळाले.

यावेळी सभापती समशेर वरपुडकर, उपसभापती दिलीप आवचार, संचालक सोपानराव आवचार, गणेश घाटगे, गंगाप्रसाद आणेराव, संदीप भंडारी, सचिव विलास मस्के यांच्यासह शेतकरी, व्यापारी मोठ्या संख्येने उपस्थित होते.

पहिल्या दिवशी १५० वाहनांतून सुमारे ८०० क्विंटल कापसाची आवक झाली होती. किमान ४,३२५ रुपये तर कमाल ४,५५१ रुपये प्रतिक्विंटल दर मिळाला. या वेळी प्रथम कापूस विक्रीस आणणाऱ्या ११ शेतकऱ्यांचा सत्कार बाजार समितीतर्फे करण्यात आला. मानवत कृषी उत्पन्न बाजार समितीच्या यार्डावर गुरुवारी कापूस खरेदीस सुरवात झाली असून पहिल्या दिवशी ४,४०० ते ४,५२७ रुपये प्रतिक्विंटल दर देण्यात आला.

या वेळी सभापती गंगाधर कदम, उपसभापती पंकज आंबेगांवकर, सचिव बालासाहेब कदम, संचालक माणिकराव काळे, नारायण भिसे, गिरिश कत्रुवार, सुनील जाधव आदी उपस्थित होते. सेलू कृषी उत्पन्न बाजार समितीमध्ये गुरुवारी लिलाव पद्धतीने कापूस खरेदीस सुरुवात झाली असून पहिल्या दिवशी ४,३२० ते ४,४७० रुपये प्रतिक्विंटल दर मिळाला.

यावेळी सभापती रवींद्र डासाळकर, उपसभापती सुंदर गाडेकर, संचालक भगवान कदम, सुखानंद कटारे, राम खराबे, दत्तराव जाधव, सहाय्यक निबंधक दिलीप गौंडर आदी उपस्थित होते. शेतकऱ्यांनी कापूस विक्रीस आणताना सात-बारा उतारा, पेरापत्रक, आधारकार्ड, आयएफएससी कोड नमूद केलेल्या बॅंक पासबुकची सत्यप्रत, मोबाईल क्रमांक आदीसह कागदपत्रे सोबत आणणे आवश्यक आहे.

ई-नाम प्रणाली अंतर्गत कापूस खरेदी केली जाणार आहे. शेतकऱ्यांच्या बॅंक खात्यामध्ये आरटीईजीएसव्दारे पेमेंट जमा करण्यात येणार आहे. शेतकऱ्यांनी स्वच्छ आणि काडी कचरा विरहित कापूस विक्रीस आणावा, असे आवाहन परभणी बाजार समितीतर्फे करण्यात आले आहे.