अकोला जिल्ह्यात कापूस खरेदी सुरू होण्याची शक्यता 

अकोला ः लॉकडाऊनमध्ये शासनाने काही बाबींना शिथिलता दिली असून कापूस खरेदीचेही आदेश दिले आहेत. मात्र, मार्चमध्ये बंद झालेली ही कापूस खरेदी आता पूर्ववत करण्यासाठी प्रशासकीय पातळीवर तयारी सुरू झाली आहे. येत्या दोन-तीन दिवसांत खरेदी सुरू होईल, असे पणनच्या सूत्रांनी सांगितले. 

‘कोरोना’चा संसर्ग रोखण्यासाठी सुरू झालेल्या लॉकडाऊनमुळे सीसीआय तसेच कापूस पणन महामंडळाची कापूस खरेदी बंद करण्यात आली होती. आता ही खरेदी पूर्ववत सुरू करण्याचे निर्देश देण्यात आले आहेत. पणन महासंघामार्फत अकोल्यात बोरगाव मंजू, कानशिवणी, तेल्हारा तर वाशीम जिल्ह्यात मानोरा, कारंजा येथे केंद्र सुरू केले जाणार आहेत. 

येथे कापूस विकण्यासाठी शेतकऱ्यांनी आधी नोंदणी करण्याच्या सूचना देण्यात आल्या आहेत. ही नोंदणी करताना यावर्षाच्या कापसाची नोंद असलेला सातबारा, शेतकऱ्यांचे बॅंक खाते क्रमांक, मोबाईल क्रमांक नोंदणी करावा लागणार आहे. आता सोशल डिस्टन्सिंग पाळत दिवसाला १५ ते २० गाड्यांची आवक केली जाईल. चारशे ते पाचशे क्विंटल कापसाचे मोजमाप करण्यात येईल. 

यासाठी शेतकऱ्यांना मोबाईलवर मॅसेज दिला जाणार असून त्याने कुठल्या वेळेत व कोणत्या दिवशी कापूस विकायला आणावा याची माहिती असेल, असेही अधिकाऱ्याने सांगितले. शासनाकडून एफएक्यू दर्जाचाच कापूस खरेदी केला जाणार आहे. आताची खरेदी बंद होण्यापूर्वी पणन महासंघाने या भागातील आपल्या केंद्रावर एक लाख ४६ हजार क्विंटल कापूस खरेदी केला आहे. 

शासनाच्या खरेदी केंद्रांवर केवळ एफएक्यू दर्जाचा कापूस घेतला जाणार आहे. यंदा पावसामुळे बराच कापूस दुय्यम दर्जाचा झालेला आहे. हा कापूस कुठे विकायचा, असा पेच तयार झाला आहे. माझ्या सारखे असंख्य शेतकरी सध्या या चिंतेने ग्रस्त झालेले आहेत. शासन हा कापूस घेणार नाही आणि खासगी खरेदीही बंद आहे. शेतकऱ्यांसाठी शासनाने यावर तोडगा काढायला हवा.  - गणेश नानोटे, कापूस उत्पादक शेतकरी, निंभारा, जि. अकोला.