खानदेशात सोमवारपासून कापूस खरेदी केंद्रे सुरू होणार

जळगाव : भारतीय कापूस महामंडळाची (सीसीआय) नोडल संस्था म्हणून पणन महासंघ खानदेशात कापूस खरेदी येत्या सोमवारपासून (ता.२७) सुरू करणार आहे. ‘सीसीआय'चे केंद्र सुरू होण्याबाबत मात्र अनिश्‍चितता आहे.  

कापूस खरेदी सुरू करण्यासंबंधी जिल्हाधिकारी यांनी सीसीआय व पणन महासंघाला बजावले आहे. ‘सीसीआय'ने मात्र खरेदी सुरू करण्याबाबत कुठल्याही हालचाली सुरू केलेल्या नाहीत. दुसरीकडे ‘सीसीआय'चे केंद्रधारक जिनींग कारखानदार एक क्विंटल कापसात ३५ किलो रुईचा उतारा व एक क्विंटल कापूस, सरकी, रुईमध्ये दोन टक्के घटीचा निकष बदलावा. या निकषानुसार कापूस खरेदी करणे नुकसानीचे आहे. कारण, कापूस कोरडा असून, उष्णतेमुळे रुई, सरकीचे वजन सतत कमी होईल. यात कारखानदारांचे नुकसान होईल, असे मुद्दे मांडत आहेत. 

जिल्हाधिकारी यांचीही केंद्रधारक कारखानदारांनी भेट घेतली असून, घट व उताऱ्याचे निकष बदलल्याशिवाय खरेदी सुरू न करण्यावर ते ठाम आहेत. यामुळे खानदेशातील ‘सीसीआय'चे कोणतेही केंद्र सुरू होणार नाहीत, अशी स्थिती तूर्ततरी आहे.  जुने नियम का बदलले? 

पूर्वी विदर्भासाठी सीसीआय, महासंघाचे कापूस खरेदीसंबंधी जे निकष असायचे, त्यानुसार खानदेशातील नियमात बदल केले जायचे. कारण, खानदेश उष्ण भाग आहे. विदर्भात ३५ टक्के उताऱ्याचा निकष असला, तर खानदेशात हा निकष ३४ टक्के असायचा. विदर्भासाठी घटीचा निकष दोन टक्के असला, तर खानदेशसाठी हा निकष तीन ते साडेतीन टक्के असायचा. परंतु, अलीकडील दोन-तीन वर्षांत नियम सर्व भागांसाठी एकसारखे केले आहेत. ते खानदेशातील केंद्रधारक कारखानदारांच्या दृष्टीने वित्तीय नुकसान करणारे आहेत. कारखानदार नुकसान सहन करून जिनींग कारखाने कसे सुरू करतील? कापूस खरेदी कशी करायची? असा प्रश्‍न ‘सीसीआय'चे केंद्रधारक कारखानदार अविनाश भालेराव यांनी उपस्थित केला.