कापूस उत्पादक प्रकाश पुप्पलवार यांचा गौरव

यवतमाळ  ः इंडियन कॉटन असोसिएशन तसेच वस्त्रोद्योग मंत्रालय भारत सरकार यांच्या वतीने पांढकरवडा तालुक्‍यातील खैरगाव देशमुख येथील कापूस उत्पादक व प्रयोगशील शेतकरी प्रकाश पुप्पलवार यांचा गौरव करण्यात आला. कापूस उत्पादकता वाढीसाठी केलेल्या कार्याची दखल घेत त्यांना सन्मानित करण्यात आले. दिल्ली येथील एका पंचतारांकीत हॉटेलमध्ये झालेल्या या सोहळ्याला केंद्रीय वस्त्रोद्योगमंत्री स्मृती इराणी यांची उपस्थिती होती.  खैरगाव देशमुख येथील प्रकाश पुप्पलवार हे दरवर्षी सुमारे १५ ते वीस एकरावर कापसाची लागवड करतात. बीटी कापूस लागवडीत त्यांचे सातत्य असून उत्पादकता वाढीसाठी देखील ते प्रयत्नशील असतात. कापूस शेतीच्या सिंचनाकरिता ठिबकचा अवलंब, त्याव्दारे विद्राव्य खताचा पिकाला पुरवठा तसेच व्यवस्थापनाच्या इतर तांत्रिक बाबींवर त्यांचा भर राहतो. या माध्यमातून एकरी सरासरी १५ क्‍विंटलची उत्पादकता त्यांना मिळते. कापूस व्यवस्थापन व त्याद्वारे उत्पादकता वाढ, अशा या त्यांच्या कार्याची दखल घेत त्यांचा गौरव करण्यात आला. या वेळी  केंद्रीय कृषी राज्यमंत्री पुरुषोत्तम रूपाला इंडियन कॉटन असोसिएशनचे महेश सारडा, राज्य कृषिमूल्य आयोगाचे अध्यक्ष पाशा पटेल, सीसीआयचे रामी यांची यावेळी उपस्थिती होती.