जळगाव ः कापसाच्या खेडा खरेदीला कमी प्रतिसाद

जळगाव ः कापसाची खेडा खरेदी मागील आठवड्यात बऱ्यापैकी झाली. सध्या महाशिवरात्री व बॅंका बंद असल्याने खेडा खरेदीला कमी प्रतिसाद मिळत आहे. दर स्थिर असून, ४८०० ते कमाल ५१०० रुपये प्रतिक्विंटलचा दर खेडा खरेदीत शेतकऱ्यांना मिळत आहेत. खानदेशात जिनिंग प्रेसिंग कारखान्यांमधील प्रक्रियेला मात्र वेग आल्याची स्थिती आहे.  खानदेशात अनेक शेतकरी शासकीय केंद्रात कापूस विक्रीला पसंती देत आहेत. कारण, या केंद्रात कापसाला किमान ५२०० रुपये प्रतिक्विंटलचा दर मिळत आहे. परंतु, खेडा खरेदीतही दर्जेदार कापसाला ५१०० पर्यंतचा दर जागेवरच मिळत असल्याने काही शेतकरी खेडा खरेदीत कापूस विक्री करीत आहेत. परंतु मागील दोन दिवसांपासून खेडा खरेदीची गती मंद झाली आहे. कारण, बॅंका शुक्रवारपासून (ता. २१) रविवारपर्यंत (ता. २३) बंद असतील. खेडा खरेदीत शेतकऱ्यांना रोखीने पैसे दिले जातात. धनादेश शेतकरी स्वीकारत नाहीत. यामुळे खरेदीदार हात राखून किंवा कमी खरेदी करीत आहेत. खानदेशात सुमारे ९१ जिनींग प्रेसिंग कारखाने सुरू आहेत. या कारखान्यांमध्ये खरेदी सुरू असून, काही कारखानदार कापसाची खेडा खरेदी एजंटच्या माध्यमातून करून घेत आहेत. सध्या धुळ्यातील शिरपूर, जळगावमधील जळगाव, रावेर, यावल व चोपडा भागांतून दर्जेदार कापूस उपलब्ध होत असल्याने या भागात मध्य प्रदेश, गुजरातमधील कारखानदारांचे एजंट कापूस खरेदी करून घेत आहेत. जळगाव व धुळ्यात मिळून रोज १८ ट्रक (एक ट्रक आठ मेट्रिक टन क्षमता) कापसाची खेडा खरेदी सुरू आहे. मागील तीन दिवसांपासून वातावरण ढगाळ असल्याने काही जिनिंग प्रेसिंग कारखान्यात कापसासह सरकीचा साठा रिकामा करून घेतला जात असून, प्रक्रिया वेगात सुरू आहे. जिनिंग प्रेसिंग कारखान्यात आवक झालेल्या कापसावर लागलीच प्रक्रिया करून घेण्यात येत आहे.  दरांवर दबाव नाही भारतीय कापूस महामंडळाची धुळ्यातील शिरपूर, नंदुरबारमधील शहादा व नंदुरबार तर जळगाव जिल्ह्यातील चोपडा, जळगाव, एरंडोल, पाचोरा, जामनेरातील शेंदूर्णी, पहूर, बोदवड, भुसावळ येथे कापूस खरेदी सुरू आहे. तर पणन महासंघाची खरेदी जळगाव जिल्ह्यातील धरणगाव, पारोळा, अमळनेर, भडगाव, धुळे, मालेगाव (जि. नाशिक) येथे सुरू आहे. यामुळे कापूस दरांवर कुठलाही दबाव सध्या दिसून येत नसल्याचे जाणकारांचे मत आहे.