देशात सर्वाधिक महाग पेट्रोल मराठवाड्यात !

लातूर : गेली सलग अठरा दिवस देशात पेट्रोल आणि डिझेलचे दर रोज वाढविले जात आहेत. यात कंपनींच्या दारापासून ते ग्राहकांच्या वाहनापर्यंत तेलाचा दर जवळजवळ दुप्पट होतो. यामध्ये अबकारी कर, राज्य सरकारांचा कर, वाहतूक खर्च आणि वितरकांचे कमीशन समावेश असतो. यामुळे देशात सर्वाधिक महागडे पेट्रोल मराठवाड्यात परभणीत मिळते आहे. त्याखालोखाल नांदेड आणि लातूरचा क्रमांक लागतो.  आंतरराष्ट्रीय बाजारातील कच्च्या तेलाचे वाढते दर आणि दिवसेंदिवस घसरत्या रुपयांच्या मूल्यामुळे पेट्रोलियम कंपन्यांना दर वाढवावे लागत आहेत. त्यात केंद्र सरकारने तब्बल तेरा वेळा तेलावरील अबकारी करात वाढ केली आहे. तर देशात सर्वाधिक तेलावर कर आकारण्यामध्ये महाराष्ट्र आघाडीवर आहे. त्यातही महाराष्ट्रामध्ये या पदार्थांवर दोन स्तरात व्हॅट आकारणी होते. मुंबई, ठाणे आणि नवी मुंबईसाठी 39.12 टक्के तर उर्वरित महाराष्ट्रसाठी किंचित कमी आकारणी केली जाते. यामुळे देशात महाराष्ट्रामध्ये सर्वाधिक करामुळे पेट्रोल अधिक महाग आहे. त्यात पेट्रोलिअम कंपन्यांच्या तळापासून शहराच्या अंतरावर वाहतूक खर्चानुसार दर वाढवून वितरकांचे कमीशनही जोडले जाते. यामुळे परभणीत रविवारी एक लिटरला पेट्रोल 91 रुपये 35पैसे, नांदेडमध्ये 91 रुपये 12 पैसे तर लातूरमध्ये 90 रुपये २८ पैसे लागत होते. 

गेल्या आठवड्यात बंगाल, राजस्थान आणि तामिळनाडू सरकरने करामध्ये कपात करून पेट्रोल आणि डिझेल दर काही प्रमाणात कमी करण्याचा प्रयत्न केला होता. स्थानिक करांमधील तफावतीमुळे देशात सर्वाधिक स्वत म्हणजे एक लिटर पेट्रोल पोर्ट ब्लेअर येथे ७० रुपये २६ पैसे, त्यानंतर पणजीमध्ये ७५ रुपये ३० पैसे लागत आहेत. केंद्र आणि राज्य सरकारच्या धोरणांमुळे एकाच देशात पेट्रोलच्या दरावर तब्बल वीस रुपयांचा फरक निर्माण झाला आहे.  

रविवारी (ता.१६) मराठवाड्यातील जिल्ह्यांमध्ये असलेले प्रति लिटर पेट्रोल दर

१. परभणी - 91.35 रुपये

२. नांदेड - 91.12 रुपये

३. लातूर - 90.28 रुपये

४. बीड - 90.25 रुपये

५.हिंगोली - 90. 22 रुपये

६. जालना - 90. 20 रुपये

७. उस्मानाबाद - 89.81 रुपये

८. औरंगाबाद - 87 रुपये