दोन बियाणे कंपन्यांविरुद्ध न्यायालयीन खटला दाखल

अकोला ः या हंगामात सोयाबीन बियाणे उगवले नसल्याने बियाणे कंपन्यांविरुद्ध शेतकऱ्यांमध्ये तीव्र रोष आहे. बाजारात निकृष्ट बियाणे दिल्या प्रकरणी जिल्हा कृषी विभागाने मूर्तिजापूर येथील न्यायालयात दोन खाजगी कंपन्यांविरुद्ध खटला दाखल केले आहे. या कंपन्यांचे बियाणे प्रयोगशाळेत अप्रमाणित आल्याचा अहवाल मिळाल्यानंतर शुक्रवारी (ता.३१)  प्रकरण दाखल करण्यात आले आहे.   या हंगामात जिल्ह्यात शेकडो हेक्टरवरील पेरण्या उलटलेल्या आहेत. याला निकृष्ट बियाणे सुद्धा कारणीभूत ठरले. कृषी विभागाने घेतलेल्या नमुन्यांपैकी सहा कंपन्यांचे बियाणे नमुने गुणवत्ता प्रयोगशाळेत अप्रमाणित निघाले आहेत. याबाबत कृषी विभागाने संबंधित कंपन्यांना खुलासे मागितले होते. मात्र सहा पैकी दोन कंपन्यांचे स्पष्टीकरण योग्य नसल्याने कृषी खात्याने या कंपन्यांविरुद्ध मूर्तिजापूर न्यायालयात खटला दाखल केला.  या दोन्ही कंपन्यांच्या बियाण्याचे नमुने मूर्तिजापूर तालुक्यात घेण्यात आले होते. त्यामुळे आता कंपन्यांविरुद्ध न्यायालयीन प्रक्रिया मूर्तिजापूर येथे चालविला जाणार आहे. बियाणे अप्रमाणित आढळलेल्या उर्वरित कंपन्यांविरोधातसुद्धा अशाच प्रकारची कारवाई केली जाणार आहे. प्रतिक्रिया अकोला जिल्ह्यात सोयाबीनचे ५१ नमुने काढण्यात आले होते. त्यापैकी ४९ नमुने जिल्हा परिषद कृषी विभागाने घेतले. यातील २५ नमुने अप्रमाणित आलेले आहेत. त्यात ८ प्रकरणात न्यायालयीन प्रक्रिया चालविली जाणार आहे. दोन कंपन्यांविरुद्ध कोर्ट केसेस केलेल्या असून उर्वरित कंपन्यांविरुद्ध आठवडाभरात न्यायालयात केस दाखल करणार आहोत.  - मुरली इंगळे, जिल्हा परिषद कृषी विकास अधिकारी, अकोला