अकलूजच्या शिवामृतकडून गाईच्या दूधाला २५ रुपये खरेदी दर

अकलूज, जि. सोलापूर : अकलूज येथील शिवामृत दूध उत्पादक सहकारी संघाने गाईच्या दूध खरेदीसाठी २५ रुपये दर जाहीर केला आहे. शिवामृत दूध संघाचा हा निर्णय कोरोणामुळे अडचणीत असलेल्या दूध उत्पादक शेतकऱ्यांना दिलासा देणारा ठरला आहे.  

संघाचे अध्यक्ष धैर्यशील मोहिते पाटील यांच्या अध्यक्षतेखालील संचालक मंडळाच्या बैठकीत हा निर्णय झाला. कोरोनाच्या पार्श्वभूमीवर अन्य संघाच्या तुलनेत शिवामृत संघही अडचणीत आहे. पण, शेतकरी हितासाठी आम्ही हा निर्णय घेतल्याचे मोहिते पाटील यांनी सांगितले. 

मोहिते पाटील म्हणाले, ‘‘शिवामृतच्या विक्रीत सध्या ४० ते ५० टक्के घट झाली आहे. परंतु, दूध उत्पादक शेतकऱ्यांची सद्य परिस्थिती लक्षात घेता ३.५ /८.५ फॅट असणाऱ्या गाईच्या दूधास प्रति लिटर २५ रूपये खरेदी दर दिला जाणार आहे. या लॅाकडाऊनमुळे दुध व दुग्धजन्य पदार्थांच्या विक्रीमध्ये ५० ते ६० टक्के घट, तर दूध पावडर, बटर, तुपाच्या दरातही मोठ्या प्रमाणात घसरण झाली आहे. खासगी डेअरी चालकांनी गाय दुधाचे दर १० ते १२ रुपये कमी करून २० ते २१ रुपये केला आहे. त्यामुळे शेतकऱ्यांचे मोठ्या प्रमाणात नुकसान झाले आहे.’’ 

‘‘सध्या ७० टक्के खासगी व सहकारी दूध संघ पावडर प्लॅंटमध्ये सक्रिय होत आहेत. यामुळे पॅकिंग दूधालाही मोठ्या प्रमाणात तोटा सहन करावा लागत आहे. तरीही आम्ही हा निर्णय घेतला. लवकरच एनडीडीबीच्या माध्यमातून दूध पावडर प्लॅंट व पशुखाद्य प्लॅंटची उभारणी करण्यात येणार आहे’’, असेही मोहिते पाटील यांनी सांगितले. यावेळी उपाध्यक्ष सावता ढोपे, कार्यकारी संचालक रविराज इनामदार देशमुख, सेक्रेटरी प्रदिप पवार आदी उपस्थित होते.