परभणी जिल्ह्यातील पीकविमा भरपाई तत्काळ जमा करावी

परभणी ः जिल्ह्यातील शेतकऱ्यांचा खरीप हंगाम २०१९-२० आणि २०२०-२१ मधील पीकविमा परतावा प्रलंबित आहे. संबंधित शेतकऱ्यांना विमा भरपाई अदा करण्यासाठी तत्काळ कार्यवाही करावी, अशी मागणी अखिल भारतीय किसान सभेच्या (लाल बावटा) परभणी जिल्हा कमिटीतर्फे जिल्हा प्रशासनाकडे करण्यात आली.

खरीप हंगामात अतिवृष्टीमुळे पिकांचे प्रचंड नुकसान झाले. त्यामुळे शासनाने शेतकऱ्यांना नुकसान भरपाई (अतिवृष्टी अनुदान) वाटप केले आहे. पीकविमा कंपन्यांना शेतकऱ्यांना पीकविमा वाटप करण्याचे आदेश प्रशासकीय व शासकीय पातळीवर आले आहेत. मराठवाड्यातील काही जिल्ह्यांत आंदोलन केले. त्यामुळे तेथे कंपन्यांनी नमते घेतले. शेतकऱ्यांच्या खात्यावर पीकविमा रक्कम जमा केली आहे. 

परभणीच्या जिल्हाधिकाऱ्यांनी व साखर आयुक्त शेखर गायकवाड यांनी जिल्ह्यातील रेणुका शुगर्स, पाथरी, लक्ष्मी नृसिंह शुगर्स, आमडापूर, ट्‍वेंटीवन शुगर, सायखेडा या साखर कारखान्यांना थकीत एफआरपीबाबत वारंवार आदेश देऊनही थकीत एफआरपीचे वाटप शेतकऱ्यांना  केले जात नाही. पीकविमा कंपनीने शेतकऱ्यांना वंचित ठेवले आहे. 

थकीत पीकविमा भरपाई व एफआरपी येत्या गुरुवारपर्यंत (ता. २०) शेतकऱ्यांच्या खात्यात जमा न केल्यास अखिल भारतीय किसान सभेच्या वतीने आंदोलन करण्यात येईल, असा इशारा किसान सभेच्या परभणी जिल्हा कमिटीचे सेक्रेटरी कॉ. दीपक लिपणे यांनी दिला.