पीकविम्याच्या नुकसानभरपाईची रक्कम डीबीटीद्वारे : पांडुरंग फुंडकर

मुंबई : शेतकऱ्यांना पीकविम्याच्या नुकसानभरपाईची रक्कम विनाविलंब मिळण्यासाठी ती थेट लाभ हस्तांतर (डीबीटी) पद्धतीने शेतकऱ्यांच्या बँक खात्यात जमा करावी, अशा सूचना कृषिमंत्री पांडुरंग फुंडकर यांनी दिल्या. पंतप्रधान पीकविमा योजनेबाबतच्या कार्यवाहीचा आढावा श्री. फुंडकर यांनी घेतला. या वेळी अपर मुख्य सचिव विजय कुमार, सहसचिव आर. बी. घाडगे, विमा कंपन्यांचे प्रतिनिधी उपस्थित होते. खरीप हंगाम २०१७ मधील पीकविमा नुकसानभरपाईबाबत कारवाईचा आढावा घेताना कृषिमंत्री श्री. फुंडकर म्हणाले, की विमा कंपन्यांनी बँक स्तरावरील शेतकऱ्यांच्या याद्यांची पडताळणी लवकरात लवकर पूर्ण करून घेऊन या याद्या विमा कंपनीच्या संकेतस्थळावर प्रसिद्ध कराव्यात. नुकसानभरपाईस पात्र असलेला एकही शेतकरी नुकसानभरपाईपासून वंचित राहणार नाही याची दक्षता घ्यावी. नुकसानभरपाईबाबतच्या प्रक्रियेला गती द्यावी. रब्बी २०१६ हंगामातील २७ कोटी ५६ लाख रुपयांची नुकसानभरपाईची रक्कम शेतकऱ्यांना वितरित करण्यात आली असून, संबंधित कंपनीने विमा योजनेचा लाभ मिळालेले शेतकरी व शेतकरीनिहाय नुकसानभरपाईचा तपशील असलेली माहिती पीकविमा पोर्टल आणि विमा कंपनीच्या संकेतस्थळावर उपलब्ध करून द्यावी, तसेच कृषी विभागालाही नुकसानभरपाईच्या रकमेसह याद्या उपलब्ध करून द्याव्यात, अशा सूचना मंत्री फुंडकर यांनी केल्या. पीकविमा नुकसानभरपाईची रक्कम शेतकऱ्यांच्या खात्यावर डीबीटीद्वारे जमा करण्याची सुविधा प्रायोगिक तत्त्वावर गोंदिया जिल्ह्यात सुरू करण्यात आली. दोन कोटी रुपयांची मदत जमा करण्यात आली आहे. भंडारा जिल्ह्यातील ११ महसूल मंडळांमध्ये डीबीटीद्वारे नुकसानभरपाई जमा करण्याचे काम सुरू करण्यात आले आहे, ते तात्काळ पूर्ण करण्याचे निर्देश कृषिमंत्र्यांनी दिले. या वेळी खरीप २०१८ च्या अनुषंगाने पीकविमा नियोजनाबाबतही चर्चा करण्यात आली.