भिवापूर, नागपूर : अतिवृष्टी व परतीच्या पावसामुळे झालेल्या नुकसानीची पाहणी करण्यासाठी केंद्र सरकारने नियुक्त केलेले पथक आढावा घेण्यासाठी सायंकाळी सहा वाजता नागपूर जिल्ह्यातील भिवापूर येथे पोहचले. मोबाईल बॅटरीच्या अंधुक प्रकाशात पथकातील सदस्यांनी शेतमालाच्या नुकसानीचा आढावा घेतला. यानंतर पथकप्रमुख तातडीने दिल्लीला रवाना झाले. यामुळे हा नुकसान पाहणी दौरा केवळ देखावा ठरल्याची चर्चा सुरू झाली आहे.
नुकसानीची पाहणी पथक सोमवारी (ता. २५) सायंकाळी सहा वाजता चंद्रपूरमार्गे नागपूर जिल्ह्यात दाखल झाले. पथकाच्या नियोजित दौऱ्यात केवळ भिवापूर तालुक्‍याचा समावेश होता. माजी आमदार सुधीर पारवे यांनी दत्तक घेतलेल्या भिवापूर तालुक्‍यातील नक्षीवडद, सोनेगाव व भिवापूर येथील शेतकऱ्यांच्या शेतांना भेटी देऊन आढावा घेणार होते. त्यासाठी दुपारी तीन वाजताची वेळ देण्यात आली होती. यामुळे जिल्हा व तालुका प्रशासनातील अधिकारी, शेतकरी व राजकीय पक्षाचे कार्यकर्ते दुपारी दोन वाजतापासून भिवापुरात पोहचले होते. पाच वाजतानंतर केंद्रीय पथक आले नसल्याने ते आता कुठे पाहणी करणार अशी चर्चा सुरू झाली होती. सायंकाळी सहा वाजता केंद्रीय पथक भिवापूर येथे पोहचले.
एसडीओ हिरामन झिरवाड, तहसीलदार अनिरुद्ध कांबळे, तालुका कृषी अधिकारी जारोंडे, कृषी अधिकरी रवींद्र राठोड यांच्यासमवेत पथक नक्षीमार्गावरील माणिक लोहकरे व प्रफुल्ल गजभिये यांच्या शेतात गेले. येथे मोबाईलच्या बॅटरीमध्ये त्यांनी शेतमालाची पाहणी केली. अंधार अधिक गडद झाल्याने पाहणी शक्‍य नसल्याने त्यांना आल्या पावली परतावे लागले. नियोजित कार्यक्रमानुसार पिकाची पाहणी करणे शक्‍य झाले नाही.
मोबाईलच्या प्रकाशात अधिकाऱ्यांना नुकसानीचा अंदाज आला का? केवळ दोन शेतकऱ्यांशी साधलेल्या संवादातून त्यांना परिपूर्ण नुकसानीचा अंदाज आला असावा काय? असे प्रश्‍न उपस्थितांनी केले. पोहचलेल्या अनेक शेतकऱ्यांशी पथकातील सदस्य संवाद साधून शकले नाहीत यामुळे हा पाहणी दौरा केवळ देखावा ठरेल काय?, अशी प्रतिक्रिया याकडे नजरा लावून बसलेल्या शेतकऱ्यांनी व्यक्त केल्या.
मांडल्या व्यथा पथकातील अधिकाऱ्यांनी माणिक लोहकरे यांच्या शेताची पाहणी केली. लोहकरे यांनी सहा एकरात धानाची रोवनी केली होती. त्यांना सव्वाशे क्विंटलचे उत्पन्नाचा अंदाज होता. मात्र पावसामुळे केवळ २५ उत्पादन झाले आहे. हे धान कापनीला परवडत नाही ते जनावरांना खाऊ घालन्याशिवाय पर्याय नाही असे लोहकरे यांनी पथकाचे प्रमुख आर. पी. सिंग यांना सांगितले. याशिवाय प्रफुल्ल गजभिये यांच्या कपाशीची पाहणी कली.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.