सातारा जिल्ह्याच्या पूर्व भागातील शेती पावसाअभावी अडचणीत

पहिल्या टप्प्यात पेरणी केलेल्या सोयाबीनची उगवण होऊ लागली आहे
पहिल्या टप्प्यात पेरणी केलेल्या सोयाबीनची उगवण होऊ लागली आहे

सातारा : जिल्ह्यात पश्चिमेकडे दमदार पाऊस, तर पूर्व भागात पावसाने दडी मारली असल्याने शेतकरी अडचणीत आले आहेत. माण, खटाव, फलटण, कोरेगाव या दुष्काळग्रस्त तालुक्यांत अत्यल्प पेरणी झाली आहे. या तालुक्यांत अजूनही पिण्याच्या पाण्यासाठी टँकर सुरू असून, पाण्याअभावी शेती पुरती अडचणीत आली आहे.

जून महिन्यात पावसाने हजेरी न लावल्याने त्याचे परिणाम सध्या दिसू लागले आहेत. जिल्ह्यात मागील सप्ताहापर्यंत अवघी ३२ टक्के क्षेत्रावर पेरणी झाली आहे. पश्चिमेकडे जादा पाऊस, तर पूर्वकडे पावसाची दडी, यामुळे जिल्ह्यातील अजूनही ६८ टक्के क्षेत्रावर नापेर आहे. जिल्ह्यात खरीप हंगामासाठी ऊस वगळून दोन लाख ९० हजार हेक्टर सर्वसाधारण क्षेत्र असून, मागील सप्ताहापर्यंत ९४ हजार ९२ हेक्टरवर म्हणजेच ३२ टक्के क्षेत्रावर पेरणी झाली आहे.

पश्चिमेकडे दमदार पाऊस असल्याने शेतातील सर्व कामे ठप्प झाली आहेत, तर पूर्व भागात पावसाअभावी पेरणी रखडली आहे. गत वर्षीच्या तुलनेत सर्वंच धरणांमध्ये पाणीसाठी कमी आहे. जुलै आणि आॅगस्ट महिन्यातील पावसाच्या स्थितीवर धरणातील पाणीसाठ्याचे भवितव्य ठरणार आहे. जिल्ह्यात गेल्या दीड महिन्यात सरासरीच्या तुलनेत खूपच कमी पाऊस झाला आहे.

यामध्ये सातारा तालुक्यात ६१२, जावलीत ७१३, पाटण तालुक्यात ६११, कराडमध्ये २७१, कोरेगाव तालुक्यात २४३, खटावमध्ये १४३, माणमध्ये ७१, फलटण तालुक्यात ७४, खंडाळा तालुक्यात १७३, वाईमध्ये २५३, महाबळेश्वरमध्ये २२६० मिलिमीटर पावसाची नोंद झाली आहे. महाबळेश्वर, सातारा, जावली, पाटण या तालुक्यांत अजूनही चांगला पाऊस होत असल्याने पेरणीची कामे खोळंबली आहेत. माण, फलटण, खटाव या तीन तालुक्यांत अजून सरासरी १५० मिलिमीटर देखील पाऊस झालेला नसल्याने पाणीटंचाई तीव्र झाली आहे. यामुळे या तालुक्यांमध्ये पेरणी झालेली नाही.   

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com