जळगाव ः खानदेशात मागील दोन दिवस भिज पाऊस झाला. त्याचा पिकांना लाभ होत आहे. अनुकूल वातावरण आहे. त्यामुळे शेतकऱ्यांचे पिकांना रासायनिक खते देण्यासह केळी पिकात नांग्या भरून घेण्याचे काम सुरू आहे.
मागील तीन दिवसांत खानदेशातीलचा पारा कमाल ३६ अंश सेल्सीअसवर खाली आला आहे. हा पारा मागील आठवड्यात ४० अंश सेल्सीअसवर होता. ऊन तापत होते. शेतात काम करताना अंगाची लाहीलाही व्हायची. अनेक शेतकऱ्यांनी पिकांचे सिंचन सुरू केले होते. अशात सोमवारी (ता.१०) वातावरण बदलले. अनेक भागात पाऊस झाला. मंगळवारीदेखील (ता.११) अनेक तालुक्यांमध्ये भिज पाऊस झाला. यामुळे प्रकल्पांमधील जलसाठा फारसा वाढलेला नसला तरी पावसाची टक्केवारी वाढली आहे.
पाऊस पडल्यानंतर तो वाहून जाण्याचे प्रमाण अतिशय कमी राहिले. यामुळे या भिज पावसाने जमिनीतील ओलावा वाढला आहे. तो अनेक दिवस टिकून राहील, असे शेतकऱ्यांचे म्हणणे आहे. जळगाव जिल्ह्यात पाऊस ६० टक्क्यांवर झाला आहे. जिल्ह्यात सप्टेंबरपर्यंत ७६५ मिलीमीटर पाऊस पडतो. यातील निम्मेपेक्षा अधिक पाऊस झाला आहे. सर्वाधिक पाऊस पाचोरा, पारोळा, भडगाव या भागात झाला आहे. या भागात ऑगस्टमधील सरासरीएवढा पाऊस झाला आहे. कमी पाऊस जळगाव, यावल या भागात आहे.
धुळे जिल्ह्यात यंदा समाधानकारक पाऊस झाला. सर्वच पिके जोमात आहेत. कुठेही पावसाचा ताण न पडल्याने स्थिती चांगली आहे. जिल्ह्यातील कनोली प्रकल्प १०० टक्के भरला आहे. तर, अनेर प्रकल्पातील आवक कायम असल्याने त्याचे दरवाजे उघडे आहेत. जिल्ह्यात सरासरीच्या ६३ टक्के पाऊस झाला आहे.
नंदुरबार जिल्ह्यात सरासरीच्या ५४ टक्के पाऊस झाला आहे. जिल्ह्यात नवापूर, अक्कलकुवा, धडगाव या पर्वतीय भागात पाऊस कमी आहे. सर्वाधिक पाऊस तळोदा तालुक्यात झाला आहे. परंतु, जिल्ह्यात पीकस्थिती चांगली आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.