सततच्या पावसाने नगर जिल्ह्यात पिकांचे नुकसान

नगर ः जिल्ह्यात गेल्या चार दिवसांपासून पडत असलेल्या जोरदार पावसामुळे खरिपातील काढणीला आलेल्या पिकांना फटका बसत आहेच; पण पावसाचे पाणी शेतात साचल्याने रब्बीत पेरणी केलेली ज्वारीसह अन्य पिकेही वाया जाण्याची शक्यता व्यक्त केली जात आहे. जिल्ह्यामध्ये चार दिवसांपासून पाऊस सुरूच आहे. 

जिल्ह्यात शेतीवरील संकटे कमी व्हायला तयार नाही. गेल्या वर्षी पाऊस नसल्याने खरीप आणि रब्बी पिके आली नाहीत. त्याचा मोठा परिणाम शेतीवर झाल्याचे दिसून आले. यंदा पावसाळ्याच्या सुरवातीला झालेल्या पावसावर खरिपाची पेरणी झाली असली तरी त्यानंतर झालेल्या पावसाला खंड पडला. त्याचा परिणाम मूग, उडीद, बाजरी, कापसावर झाला. आता अशा अनेक संकटांतून वाचलेली पिके आता काढणीला आली आहेत. आता चार दिवसांपासून जिल्ह्याच्या अनेक भागांत जोरदार पाऊस सुरू आहे. पावसामुळे शेतात पाणी साचत आहे. सध्या खरिपातील सोयाबीन, बाजरी, मका, भात पिके काढणीला आलेली आहेत. काही ठिकाणी काढणीची कामे झाली आहेत. मात्र, सतत पाऊस पडत असल्याने व शेतात पाणी साचल्याने या पिकांचे नुकसान होत असून कोंब फुटू लागले आहेत. 

यंदा रब्बी पेरणीला सुरवात झाली आहे. साधारण पन्नास टक्के क्षेत्र पेरूनही झाले आहे. रब्बीत ज्वारीचे क्षेत्र अधिक असते. मात्र, पेरलेल्या शेतात पाणी साचत असल्याने उगवण झालेल्या ज्वारीलाही धोका निर्माण होण्याची शक्यता आहे. शिवाय चार दिवसांपासून अनेक भागांत सूर्यदर्शन नसल्याने भाजीपाला व अन्य पिकांवर रोगांचाही प्रादुर्भाव होऊ लागला असल्याचे शेतकरी सांगत आहेत. पावसामुळे होणारे पिकांचे नुकसान होत असल्याने त्याचा मोठा आर्थिक फटका बसणार असल्याचे स्पष्ट झाले आहे.