अकोला जिल्ह्यातील सव्वातीन लाख हेक्टरवरील पिके पावसामुळे बाधित 

अकोला  : जिल्ह्यात ऑक्टोबर महिन्यात झालेल्या अतिवृष्टीमुळे सुमारे सव्वातीन लाख हेक्टर क्षेत्रावरील पिके बाधित झाल्याचा प्राथमिक अंदाज कृषी विभागाने वर्तविला आहे. अतिवृष्टीमुळे जिल्ह्यातील सुमारे २ लाख ९३ हजार ५८८ शेतकऱ्यांना फटका बसला आहे. 

आॅक्टोबर महिन्यात झालेल्या संततधार पावसाने काढणीला आलेली पिके हातातून गेली आहेत. जिल्ह्यात खरिपात ३ लाख ८५ हजार ७११ हेक्टरवर विविध पिकांची पेरणी झाली होती. समाधानकारक पावसामुळे पिके चांगली येतील, असा अंदाज शेतकऱ्यांना होता.  परंतु ऑक्टोबर महिन्यात संततधार पाऊस झाल्याने आधी मूग, उडीद त्यानंतर सोयाबीन, ज्वारी, कापूस या पिकांचे अतोनात नुकसान झाले. प्राथमिक अंदाजानुसार ३ लाख २३ हजार ६६२ हेक्टरक्षेत्र पावसामुळे बाधित झाले आहे. १००६ गावांमधील हे शेतीक्षेत्र आहे.