कोल्हापुरात भात, सोयाबीन, भुईमुगाला पावसाचा फटका

कोल्हापूर  : गेल्या चार दिवसांपासून पडणाऱ्या संततधार पावसाने खरीप पिकांचे मोठे नुकसान झाले आहे. यामध्ये कापणीला आलेला भात, सोयाबीन व भुईमूग शेंगांना फटका बसत आहे. अनेक ठिकाणी शेतांची तळी झाल्याने शेतीकामे ठप्प झाली आहेत. कृषी विभागाने तातडीने पंचनामे करून नुकसानभरपाई द्यावी, अशी मागणी शेतकऱ्यांकडून होत आहे.

गेल्या काही दिवसांपासून दुपारपासून पडणाऱ्या पावसाने शेतीकामांचे वेळापत्रक ठप्प झाले आहे. शेतात पाणी साचून राहिल्याने भात झोडपणी, सोयाबीनची काढणी, मळणी आदी कामे ठप्प आहेत. याच बरोबर भुईमुगाची काढणी रखडल्याने आता भुईमूग शेंगांचेही मोठे नुकसान होण्याची शक्‍यता आहे. सातत्याने पडणाऱ्या पावसामुळे भुईमुगाचे उत्पादन कमी होण्याची शक्‍यता आहे. त्यातच आहे तो भुईमूग काढणेही शेतकऱ्यांना शक्‍य होत नसल्याचे चित्र आहे.

भाजीपाला उत्पादकांनाही दररोज पडणाऱ्या पावसाचा दणका बसला आहे. पाणी साचून राहात असल्याने भाजीपाला बाहेर काढणे अशक्‍य होत असल्याचे तो कुजून जात असल्याची स्थिती आहे.