नांदेड जिल्ह्यात गारपीटीमुळे पिके मातीमोल

नांदेड : जिल्ह्यातील ४० मंडळांमध्ये मंगळवारी (ता.७) सकाळ पर्यंतच्या २४ तासांत मध्यम ते जोरदार पाऊस झाला. गारपीट देखील झाली. त्यामुळे ज्वारी, गहू, हरभरा, हळद,फळपिके, भाजीपाला पीकांचे अतोनात नुकसान झाले. एकीकडे ‘लॅाकडाऊन’मुळे शेतमाल विक्रीसाठी अडचणी येत आहेत. त्यात नेमकी सुगीमध्येच गारपीट झाल्याने शेतकरी दुहेरी संकटात सापडले आहेत. 

जिल्ह्यातील कंधार, मुखेड, देगलूर, नांदेड, मुदखेड, अर्धापूर, हदगाव, किनवट, हिमायतनगर, भोकर, उमरी, लोहा आदी तालुक्यातील ४० मंडळांत मध्यम ते जोरदार पाऊस झाला. कंधार, मुखेड तालुक्यातील अनेक मंडळांत जोरदार पाऊस झाला.

कंधार तालुक्यातील बाचोटी, मानसपूरी, फुलवळ,अंबुलगा, वाखरड,पानशेवडी, बोरी बु.,चिंचोली आदी गावांत वादळी वाऱ्यासह जोरदार गारपीट झाली. त्यामुळे ज्वारी, गहू, हरभरा आदी रब्बी पिके, काढणी केलेली व शिजवलेली हळद, आंबा, संत्रा, टरबूज, खरबूज आदी फळपिके, टोमॅटो, वांगी, कांदे आदी भाजीपाला पिके, उन्हाळी भूईमूग, उन्हाळी ज्वारी, मका आदी पिकांचे मोठे नुकसान झाले. 

उशीरा पेरणी केलेली ज्वारी, गहू आदी पिके अजून उभी आहेत. तर, अनेक काही या पिकांची खळी सुरु आहेत. हळद पिकाची काढणी, तसेच शिजवणीची कामे सुरु आहेत. गारपीटीचा तडाखा बसल्यामुळे सर्वच शेतमालाची प्रत खराब झाली. नुकसानीचे पंचनामे करुन तत्काळ मदत करावी, अशी मागणी शेतकऱ्यांनी केली.  मंडळनिहाय पाऊस (मि.मी) 

 कंधार ८, कुरुला ४, उस्माननगर ६, बारुळ ६, पेठवडज २७, फुलवळ २२, किनी ४, मातुल ५, कलंबर ५, देगलूर ४, खानापूर २, शहापूर ३, मरखेल २, मालेगाव ४, हानेगाव ३, किनवट ७, इस्लामपूर ४, जलधारा ६, शिवणी २, मुदखेड १५, बारड ५, मुगट ९, अर्धापूर १, दाभड ९, हिमायतनगर ७, सरसम ६, जवलगाव ५, मुखेड २९, जांब ३३, येवती २०, जाहूर १२, चांडोळा ४०, बाऱ्हाळी ४, सिंधी ४, हदगाव ३, पिंपरखेड ८, नांदेड शहर ९, वसरणी २, वजीराबाद २, तरोडा २.