नांदेड जिल्ह्यात रब्बी हंगामासाठी पीक विमा योजना लागू

नांदेड : पंतप्रधान पीकविमा योजना रब्बी हंगाम सन २०२१-२२ मध्ये राबविण्यात येणार आहे. विमा योजना कर्जदार व बिगर कर्जदार शेतकऱ्यांसाठी ऐच्छिक आहे. या योजनेअंतर्गत वास्तवदर्शी विमा हप्ता आकारण्यात येणार आहे. रब्बी हंगामातील पिकांसाठी दीड टक्के असा मर्यादित आहे. जिल्ह्यातील गहू (बागायती), ज्वारी (जिरायती), हरभरा या पिकांसाठी ही योजना लागू आहे. 

या योजनेअंतर्गत गहू (बा.) या पिकासाठी पीकविमा संरक्षित रक्कम हेक्टरी ३८ हजार रुपये. शेतकऱ्यांनी भरावयाचा पीकविमा हप्ता हेक्टरी ५७० रुपये आहे. विमा लागू असलेले तालुके नांदेड, अर्धापूर, मुदखेड, बिलोली, लोहा, कंधार, नायगाव, धर्माबाद, किनवट, हिमायतनगर, भोकर, हे हदगाव आहेत. पीकविमा ऑनलाइन करण्याची अंतिम तारीख १५ डिसेंबर राहील. ज्वारी (जिरायती) या पिकांसाठी पीकविमा संरक्षित रक्कम हेक्टरी २८ हजार रुपये आहे. 

शेतकऱ्यांनी भरावयाचा पीकविमा हप्ता हेक्टरी ४२० रुपये आहे. विमा लागू असलेले तालुके नांदेड, देगलूर, नायगाव, बिलोली, मुखेड, धर्माबाद, किनवट, हदगाव हे आहेत. पीकविमा ऑनलाइन करण्याची अंतिम तारीख ३० नोव्हेंबर आहे. हरभरा या पिकासाठी पीकविमा संरक्षित रक्कम हेक्टरी ३५ हजार रुपये आहे. हप्ता रुपये हेक्टरी ५२५ रुपये आहे. विमा लागू असलेले तालुके नांदेड, अर्धापूर, मुदखेड, बिलोली, लोहा, कंधार, देगलूर, नायगाव, धर्माबाद, मुखेड, किनवट, माहूर, हिमायतनगर, भोकर, हदगाव, उमरी ही आहेत. अर्ज ऑनलाइन करण्याची अंतिम तारीख १५ डिसेंबर राहील.  ही योजना इफ्को टोकियो जनरल इंशुरन्स कंपनीतर्फे राबविण्यात येणार आहे. कर्जदार व बिगर कर्जदार शेतकऱ्यांना पीकविमा उतरवण्याची अंतिम तारीख ज्वारीसाठी ३० नोव्हेंबर आहे. गहू, हरभरा पिकासाठी १५ डिसेंबर ही तारीख आहे. अधिकच्या माहितीसाठी शेतकऱ्यांनी तालुका कृषी अधिकारी, जवळच्या बँकेशी संपर्क साधावा, असे आवाहन जिल्हा अधीक्षक कृषी अधिकारी रविशंकर चलवदे यांनी केले.