यंदाच्या 'उत्कृष्ट आदर्श गावा'विषयी उत्सुकता

यंदाच्या 'उत्कृष्ट आदर्श  गावा'विषयी उत्सुकता
यंदाच्या 'उत्कृष्ट आदर्श गावा'विषयी उत्सुकता

९ एप्रिलपूर्वीच निवड प्रक्रिया पूर्ण होण्याची शक्यता   पुणे : आदर्श गाव योजनेत सहभागी झालेल्या गावांच्या निवडीची प्रक्रिया यंदा लवकरच सुरू होणार आहे. राज्याचा ''उत्कृष्ट आदर्श गाव पुरस्कार'' यंदा कोणत्या गावाला मिळतो याबाबत ग्रामपंचायतींचे लक्ष लागून आहे. जलसंधारणात काम करणाऱ्या विविध घटकांसाठी राज्य शासनाकडून ४६० प्रकारचे पुरस्कार दिले जातात. तसेच पुरस्कार राज्यात आदर्शगाव चळवळीत कामे करणाऱ्या घटकांसाठीदेखील सुरू करावेत, असा प्रस्ताव ‘आदर्श गाव संकल्प व प्रकल्प समिती’चे कार्याध्यक्ष पोपटराव पवार यांनी शासनासमोर मांडला होता. श्री. पवार यांचा प्रस्ताव स्वीकारून उत्कृष्ट आदर्श गावांसाठीदेखील पुरस्कार निर्णय यंदा शासनाने घेतला आहे. जलसंधारणमंत्री प्रा. राम शिंदे यांच्यासह पोपटराव पवार तसेच जलसंधारण सचिव एकनाथ डवले यांचा समावेश असलेल्या उच्चस्तरीय समितीकडून ''उत्कृष्ट आदर्श गाव'' घोषित केले जाणार आहे. ९ एप्रिलच्या पूर्वीच ही निवड प्रक्रिया पूर्ण होण्याची शक्यता आहे. या उपक्रमामुळे गावागावांमध्ये विकासाची स्पर्धा वाढीस लागेल, असे आदर्श गाव समितीचे म्हणणे आहे. "राज्यात यंदाचा पहिला उत्कृष्ट आदर्शगाव पुरस्कार मिळवणाऱ्या गावाला पाच लाख रुपये मिळणार आहेत. द्वितीय क्रमांकाच्या गावाला तीन लाखाचा तर तृतीय क्रमांकाच्या गावाला दोन लाखाचा पुरस्कार दिला जाईल. आदर्श गावासाठी उत्कृष्ट काम करणाऱ्या तीन संस्थांनादेखील पुरस्कार दिले जातील, अशी माहिती सूत्रांनी दिली. आदर्श गाव होण्यासाठी परिश्रम घेणारे ग्राम कार्यकर्ते आणि ग्रामस्तरीय शासकीय कर्मचाऱ्यांना आदर्शगाव पुरस्कार योजनेत गौरविण्यात येणार आहे. "या पुरस्कार योजनेतील पात्रतेच्या अटी अंतिम टप्प्यात असून आठवडाभरात ग्रामपंचायतींना नियमावली पाठविली जाईल, असेही सूत्रांनी स्पष्ट केले. राज्य शासनाकडून ''उत्कृष्ट आदर्श गाव'' निवडताना काटेकोर नियम लावले जाणार आहेत. मागील तीन वर्षांत ५० टक्के ग्रामसभा तहकूब असल्यास अशा गावाची निवड पुरस्कारासाठी होणार नाही. मागील तीन वर्षांत ग्रामविकासाची सप्तसूत्री राबविलेले, दहा हजार मनुष्यदिवस श्रमदान केलेले व तंटामुक्त असलेले, परंतु पाणलोट विकासाची ८० टक्के कामे केलेल्या गावाला राज्याचे ''उत्कृष्ट आदर्श गाव'' होण्याची संधी आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com