पुणे: भारतीय अन्न सुरक्षितता व मानके प्राधिकरणाच्या (एफएसएसएआय) मुख्य कार्यकारी पदावरून (सीईओ) पवनकुमार अग्रवाल यांची बदली झाली आहे. त्यामुळे नव्या ‘सीईओ’कडे दूध उद्योगाचे लक्ष लागून आहे. श्री. अग्रवाल आता केंद्रीय ग्राहक व्यवहार मंत्रालयाचे सचिव झाले आहेत. राज्यातील दूध तसेच अन्न प्रक्रिया क्षेत्रातील घटकांचे लक्ष सतत प्राधिकरणाकडे लागून असते. कारण, या संस्थेकडे दूध व कृषी प्रक्रिया क्षेत्रातील विविध उत्पादनांची मानके ठरविली जातात. त्यामुळे नवा ‘सीईओ’ कोण? याविषयी डेअरी उद्योगाला उत्सुकता लागून आहे. प्राधिकरणाचे नेतृत्व आधी युधिरसिंग मलिक या आयएएस अधिकाऱ्याकडे होते. त्यांनी मॅगी विक्रीवर बंदी आणून देशभर खळबळ उडवून दिली होती. अर्थात, बंदी प्रकरण मलिक यांना महागात पडले. त्यांची एक वर्षात उचलबांगडी झाली. 2015 पासून श्री. अग्रवाल यांच्याकडे ‘सीईओ’पद आले. त्यांनी मात्र, केंद्राची मर्जी सांभाळत या पदावर मुदतवाढ मिळवली. देशात दुधाची भेसळ वाढत असताना श्री. अग्रवाल यांनी दूध उद्योगाची बाजूला लावून धरली. “भेसळीबाबत अकारण बाऊ केला जातोय. अप्रमाणित नमुने केवळ सात टक्के नमुने आढळले आहेत. बाजारपेठेतील दूध अतिशय सुरक्षित आहे,” असा दावा प्राधिकरणाने काही महिन्यांपूर्वी केला होता. मात्र, दूध व दुग्धजन्य पदार्थांसाठी नवी मानके प्राधिकरणाने लागू केली. त्यामुळे डेअरी उद्योगाच्या तांत्रिक समस्येत वाढ झाली आहे. राज्यातील दूध उत्पादक शेतकऱ्यांकडून प्रतिजैविकेयुक्त दूध नाकारण्याची भूमिका अलीकडे काही डेअरीचालकांनी घेतली. त्यामुळे ‘एफएसएसएआय’ची नियमावलीच कारणीभूत असल्याचे सांगितले जाते. “डेअरी उद्योगाला अजूनही अफ्लॉटॉक्सिन तसेच प्रतिजैविकांची समस्या भेडसावते आहे. प्राधिकरणाने याबाबत काही कडक नियमावली जारी केली आहे. अर्थात नियम पाळले जात नाही म्हणून कडक कारवाईची भूमिका श्री. अग्रवाल यांनी ठेवलेली नव्हती. त्यामुळे नवे ‘सीईओ’ काय भूमिका घेतात? याविषयी आम्हांला उत्सुकता आहे,” अशी माहिती डेअरी उद्योगातील सूत्रांनी दिली. राज्य शासनाचा विभाग अजूनही झोपेत देशात विविध बदल होत असताना दुग्धव्यवसाय विकास विभाग झोपेत आहे. http://dairy.maharashtra.gov.in/honble_ministers या संकेतस्थळावर नवे बदल सोडाच; पण स्वतःचे पालकत्व सांभाळणारे मंत्री, अधिकारी कोण? हेदेखील सांगण्यात आलेले नाही. विशेष म्हणजे दुग्धविकासमंत्री म्हणून महादेव जानकर तर राज्यमंत्री म्हणून अर्जुन खोतकर यांचेच नाव कायम आहे. तसेच सचिव म्हणून ए. एल. जरहाड यांचा उल्लेख कायम आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.