बेदाण्याला दराची गोडी

सांगली ः होळी सणाच्या पार्श्वभूमीवर बेदाण्याची मागणी वाढल्याने गेल्या आठवड्यात बेदाण्याला १३५ ते १७५ रुपये असा दर मिळाला. गेल्या आठवड्यापेक्षा १० ते १५ रुपयांची वाढ झाली असून, बेदाण्याला प्रतिकिलोस सरासरी १४५ ते १९० रुपये असा दर मिळ आहे. तासगावच्या बाजारपेठेत दर्जेदार बेदाण्याची आवक होत आहे. यंदा बेदणा उत्पादनात १० हजार ते १५ हजार टन वाढ होण्याची शक्यता आहे. यंदाचा हंगाम उत्पादकांना गोडी देणारा ठरत आहे. यंदा बेदाणानिर्मितीसाठी अनुकूल वातावरण आहे. त्यातच द्राक्षाला अपेक्षित दर मिळत नसल्याने शेतकरी बेदाणा निर्मितीकडे वळले आहेत. त्यामुळे बेदाणा उत्पादनात यंदा १० हजार ते १५ हजार टन वाढीची शक्यता आहे. बेदाणा हंगाम सुरू झाल्यापासून दर वधारले आहेत. त्यामुळे बेदाणा उत्पादकांना दिलासा मिळाला. राज्यात दरवर्षी सरासरी १ लाख ६० हजार ते १ लाख ८० हजार टन बेदाण्याचे उत्पादन होते. यंदा प्रतिकूल परिस्थितीत शेतकऱ्यांनी द्राक्ष बागा जगविल्या. त्यातच एकाच वेळी द्राक्षे विक्रीला आल्याने सुरवातीच्या काळात अपेक्षित दर नव्हता. त्यामुळे शेतकऱ्यांनी बेदाणा निर्मितीला प्राधान्य दिले.   २०१६-१७ मध्ये १ लाख ८० हजार टन बेदाण्याचे उत्पादन झाले होते. गेल्या वर्षी ऐन हंगामात अवकाळी पावसाने द्राक्षाचे मोठ्या प्रमाणात नुकसान झाले होते. त्यामुळे बेदाण्याचे उत्पादन १ लाख ६० हजार टन झाले होते. म्हणजेच २० हजार टन उत्पादन कमी झाले होते. परिणामी बेदाण्याचे दर वराधले, त्यामुळे शेतकऱ्यांनी बेदाण्याची विक्री केली असल्याने शीतगृहात बेदाणा शिल्लक राहिला नाही.  आवक, मागणीही वाढली  गेल्या महिन्याभरात तासगाव बाजार समितीत सुमारे ७०० ते ८०० टन बेदाण्याची आवक आणि विक्री होत होती. होळी सणाच्या पार्श्वभूमीवर बेदाण्याची आवक वाढली आहे. सध्या बाजार समितीत ९०० ते १००० टन बेदाण्याची आवक होऊ लागली आहे. दर्जेदार बेदाणा विक्रीसाठी येऊ लागल्याने बेदाण्याला मागणी वाढली असल्याची माहिती बाजार समितीच्या सूत्रांनी दिली.  बेदाण्याचे दर (रुपये, प्रतिकिलो) हिरवा    १४५ ते १९० पिवळा    १४० ते १८०  काळा    ६० ते ९५