परभणीतील ग्राहकांना किराणासह भाजीपाला ऑनलाइन मिळणार

परभणी : जीवनावश्यक किराणा मालाची गरज लक्षात घेऊन परभणी शहरातील नागरिकांसाठी जिल्हाधिकारी दीपक मुगळीकर यांच्या संकल्पनेतून ‘पीबीएन शॉप’ हे मोबाईल अॅप विकसित करण्यात आले आहे. या अॅपमध्ये सुधारणा करण्यात आली आहे. याद्वारे आता किराणा मालासोबतच भाजीपाला देखील ऑनलाइन खरेदी करता येणार आहे. 

या अॅपमध्ये भाजीपाला नावाचा स्वतंत्र विभाग आहे. सध्याच्या अॅप धारकांना ही सुविधा वापरासाठी नव्याने डाऊनलोड करावयाची आवश्यकता नाही. त्यांना फक्त त्यांच्याकडील अॅप अपडेट करावे लागेल. नवीन डाउनलोड करणाऱ्यांना सुधारीत आवृत्तीच डाऊनलोडद्वारे उपलब्ध होईल. गुगल प्ले स्टोअरवर हे अॅप विनामूल्य उपलब्ध आहे. अँड्रॉइड मोबाईल धारक हे अॅप वापरू शकतील. संगणकावर www.pbnshop.in द्वारे देखील ही प्रणाली वापरता येईल. 

जिल्हा आपत्ती व्यवस्थापन प्राधिकरणातर्फे ही सेवा पुरविण्यात येत आहे. त्यासाठी मॅप ऑन कंपनीचे सीईओ सचिन देशमुख, प्रवीण बाळासाहेब देशमुख यांच्यातर्फे ही सेवा विनामूल्य देण्यात आली. राष्ट्रीय सूचना विज्ञान केंद्र ( NIC ) जिल्हा सूचना विज्ञान अधिकारी सुनील पोटेकर यांच्या मार्गदर्शनाखाली या संगणक प्रणालीचा विकास केला आहे. 

किराणा मालाप्रमाणेच भाजीपाल्याची ऑर्डर दिल्यानंतर २४ तासाच्या आत घरपोच सेवा मिळेल. ऑर्डर देताना नागरिकास त्याचा मोबाईल क्रमांक आणि संपूर्ण पत्ता स्पष्टपणे नमूद करावयाचा आहे. भाजीपाल्याच्या भावातील चढ- उतार लक्षात घेता ऑर्डर देताना नागरिकांना त्यांच्या भाजीपाल्याची अंदाजित किंमत अॅपमध्ये दिसते. परंतु, प्रत्यक्ष बाजारात असलेल्या किंमतीत तफावत असू शकते. परंतु, ऑर्डर घरपोच देताना प्रत्यक्ष बाजारपेठेतील दराप्रमाणे पावती देण्यात येईल. त्यानुसार रक्कम अदा करावयाची आहे. घरपोच सेवा पुरविण्यासाठी स्वयंसेवी संस्थांनी पुढाकार घेतला आहे. त्यांच्या स्वयंसेवकांतर्फे ही सेवा विनामुल्य मिळेल. त्यासाठी कोणतीही अधिकची रक्कम बिलात लावण्यात येणार नाही.