कडवा कालव्यासाठी धरणातून आवर्तन साेडले

सायखेडा, जि. नाशिक : निफाड तालुक्यातील दक्षिणेकडील काही गावे आणि सिन्नर तालुक्याच्या पूर्वेकडील दुष्काळग्रस्त गावांना वरदान ठरलेल्या कडवा कालव्याला १ डिसेंबरपासून २६ ते २७ दिवसांचे आवर्तन सोडण्यात आले. त्यामुळे १७०० हेक्टरवरील रब्बी पिकांना दिलासा मिळाला.

कडवा धरणात सध्या १३५० दशलक्ष घनफूट जलसाठा शिल्लक आहे. त्याची क्षमता १६८० दशलक्ष घनफूट आहे. ८५० दशलक्ष घनफूट पाणी सिंचन आणि बिगरसिंचनासाठी वापरण्यात येणार आहे, तर उर्वरित जलसाठा दुष्काळी स्थितीमुळे पिण्यासाठी आरक्षित करण्यात आला आहे. कालव्याला सुरवातीला २७५ क्युसेकने विसर्ग सुरू आहे. अखेरपर्यंत ३५० क्युसेकपर्यंत विसर्ग सोडण्यात येणार आहे. ८८ किलोमीटर लांबीच्या कडवा कालवा क्षेत्रातील २६ गावांना याचा फायदा होईल, अशी माहिती कार्यकारी अभियंता शरद गायधनी यांनी दिली.

पावसाच्या कमी प्रमाणामुळे कडवा कालवा परिक्षेत्रातील विहिरींनी पावसाळ्यातच तळ गाठला. खरीप हंगामातील पिकेदेखील करपून गेली. सोयाबीन, मका, ऊस, कांदे या नगदी पिकांना पाणी नसल्याने भांडवली खर्चसुद्धा पाण्यात गेला. थोड्याफार प्रमाणात असलेल्या फळबागा वाचविण्यासाठी आणि रब्बी हंगामातील हरभरा, गहू, उन्हाळी कांद्यासाठी कालव्याला पाणी सोडावे, अशी मागणी शेतकऱ्यांनी केल होती. जलसंपदामंत्री गिरीश महाजन यांच्या मार्गदर्शनाखाली झालेल्या बैठकीत आमदार अनिल कदम यांनीही या मागणीचा पाठपुरावा केला. त्यानुसार आवर्तन सोडण्यात आले.