मराठवाड्यात दूध संकलनात प्रतिदिन घट

औरंगाबाद : मराठवाड्यात प्रतिदिन दूध संकलनाचा आलेख घटताच आहे. जूनअखेरीस प्रतिदिन ९ लाख ९५ हजार लिटर होणारे दूध संकलन जुलैअखेरीस ९ लाख ९४ हजार लिटर प्रतिदिनवर आले. अनुकूल स्थितीत शेतीपूरक दुग्ध व्यवसायातील दूध संकलनातील घट चिंता वाढविणारी मानली जात आहे.

एप्रिल ते मार्च २०१९-२० दरम्यान मराठवाड्यात प्रतिदिन सरासरी ८ लाख ९९ हजार लिटर दूध संकलन केले गेले. गतवर्षी जुलैअखेर दुष्काळाने त्यात घट आली होती. जवळपास ८ लाख ९ हजार लिटर प्रति दिन दूध संकलन केले जात होते. एप्रिलमध्ये प्रतिदिन दूध संकलन ११ लाख २७ हजार लिटरवर पोहोचले होते. मे महिन्यात प्रतिदिन ११ लाख १ हजार लिटरवर संकलन आले.

जूनमध्ये हा आकडा प्रतिदिन ९ लाख ९५ हजार लिटरवर आला होता. जुलै अखेरच्या आकडेवारीनुसार मराठवाड्यातून शासकीय दुध डेअरीचे संकलन ३३ हजार लिटर, सहकारी डेअरींचे ३ लाख ४८ हजार लिटर, तर खासगी दूध डेऱ्यांचे संकलन ६ लाख १३ हजार लिटर प्रतिदिन झाले. जून महिन्याच्या तुलनेत जुलैअखेरीस शासकीय व खासगी डेअरींच्या किंचित वाढ, तर सहकारी दूध डेरीच्या किंचित घट नोंदली गेली आहे. दूध उत्पादकांच्या आक्रमक भूमिकेमुळे दूध संकलनावर परिणाम झाला होता.

संकलित दुधापैकी १ लाख ९४ हजार लिटर पॅकिंग करून विकले जात आहे. जवळपास १ लाख ५ हजार लिटर दूध राज्याबाहेर विक्रीसाठी जाते. एकूण वितरणापैकी १ लाख ६ हजार लिटर दूध महानंद मुंबईला वितरण करीत असल्याची माहिती सूत्रांनी दिली.