श्री विठ्ठल-रुक्मिणी मंदिरात प्रक्षाळपुजा, नित्योपचार सुरु

सोलापूर ः  आषाढी यात्रेच्या कालावधीसाठी श्री विठ्ठल-रूक्मिणी मातेचे दररोजचे नित्योपचार थांबविण्यात येत असतात. या कालावधीत देवाचा पलंग काढून श्री विठ्ठलास लोड व रूक्मिणी मातेस तक्क्या देण्यात आलेला असतो. आषाढी वारीसाठी श्री विठ्ठल-रुक्मिणी अखंड २४ तास भक्तांना दर्शन देण्यासाठी उभे असतात,  या भावनेने श्री विठ्ठल-रुक्णिमणीमातेचा थकवा घालविण्यासाठी प्रक्षाळ पूजा केली जाते. कोरोनामुळे यंदा वारी झाली नसली, तरी परंपरेनुसार यंदाही  गुरुवारी (ता.९) पूजा करण्यात आल्यानंतर मंदिरातील नित्योपचार पुन्हा सुरु करण्यात आले.    मंदिर समितीचे कार्यकारी अधिकारी विठ्ठल जोशी व व्यवस्थापक बालाजी पुदलवाड यांच्या हस्ते ही पुजा झाली. प्रक्षाळ पूजेनिमित्त श्री विठ्ठल-रुक्मिणीस नित्यपूजा, पहिले स्नान, महाअभिषेक, पारंपरिक दागिने व आकर्षक पोशाख परिधान करण्यात आला होता. त्यानंतर महानैवेद्य व आरती, धुपारती, शेजारती असा नित्य क्रमाने प्रक्षाळ पूजा झाली. यावेळी श्री विठ्ठल रुक्मिणीमातेच्या गाभाऱ्यात विविध रंगीबेरंगी फुलांची आकर्षक सजावट करण्यात आली होती.  आता शुक्रवारपासून (ता.१०) श्री विठ्ठलावरील रोजचे नित्योपचार सुरू करण्यात आल्याची माहिती मंदिर समितीकडून देण्यात आली. 

चौदा पदार्थांपासून बनविला काढा श्री विठ्ठल-रुक्मिणी मातेचा थकवा दूर व्हावा, यासाठी खास काढा देण्याची जुनी परंपरा आहे. त्यानुसार गवती चहाची पाने, गूळ, जायफळ, लेंडीपिंपळी, ज्येष्ठमध, काळे मिरे, काजू, बदाम, खारीक, सुंठ, बेदाणा, लवंग, वेलदोडा, चारोळे आदी विविध पदार्थांपासून खास काढा बनविण्यात आला होता़.  विठ्ठलाला आलेला शिणवटा या काढ्यामुळे दूर होतो, अशी यामागची भावना असल्याचे सांगण्यात आले़.