मराठवाडी धरणग्रस्तांनी बंद पाडले धरणाचे बांधकाम

ढेबेवाडी, जि. सातारा : ‘आधी पुनर्वसन मगच धरण’ या धोरणाची काटेकोरपणे अंमलबजावणी करा आणि आमचे सर्व प्रलंबित प्रश्न मार्गी लावूनच इकडे फिरका, असे प्रशासनाला ठणकावून सांगत बुधवारी (ता. २६) मराठवाडी धरणग्रस्तांनी धरणस्थळी सत्याग्रह करत धरणाचे बांधकाम बंद पाडले. 

पुनर्वसन कायद्याचे उल्लंघन करत मराठवाडी धरणाचे बांधकाम पुढे रेटले जात असल्याचा आरोप करत जनजागर प्रतिष्ठानने आंदोलनाची हाक दिली होती. त्यानुसार बुधवारी सकाळी मेंढ, उमरकांचन, जाधववाडी, मराठवाडी, जिंती येथील धरणग्रस्त महिला व पुरुष धरणस्थळी दाखल झाले. प्रतिष्ठानचे येथील मुख्य समन्वयक जितेंद्र पाटील, पुनर्वसन प्राधिकरण समितीचे विभागीय सदस्य जगन्नाथ विभूते यांनी धरणग्रस्तांचे विविध प्रलंबित प्रश्न आणि त्यासाठी केलेला पाठपुरावा याबाबत धरणग्रस्तांना माहिती दिली. 

शासकीय यंत्रणेकडून येत असलेले वाईट अनुभवही त्यांनी सांगितले. पुनर्वसन, भूखंड व जमीन वाटप, मंजूर रोख रकमेचे वाटप, नागरी सुविधा, शेतीला पाणीपुरवठा आदींशी संबंधित सुमारे ११ मागण्या प्रलंबित असल्याचे सांगत जोपर्यंत त्यावर निर्णय होत नाही, तोपर्यंत आंदोलन सुरूच राहील, असे त्यांनी स्पष्ट केले.यावेळी विलास जाधव, उमेश शिंदे, तानाजी सावंत, आनंदराव मोहिते, पांडुरंग पाटील, अर्चना पाटील, छबुताई मोहिते आदींसह विविध गावचे धरणग्रस्त महिला व पुरुष उपस्थित होते.