पुणे जिल्ह्यातील धरणांत १५० टीएमसी उपयुक्त पाणीसाठा

पुणे  : जुलै महिन्याच्या सुरवातीपासून पाणलोटक्षेत्रात सुरू असलेल्या पावसाने धरणांतील पाणीपातळीत वाढ झाली. उजनीसह जिल्ह्यातील धरणांची एकूण उपयुक्त पाणीसाठा क्षमता २१८.४० टीएमसी असून, सोमवारी (ता. ३०) सकाळी आठ वाजेपर्यंत सर्व २७ धरणांमध्ये मिळून सुमारे १४९.२३ टीएमसी (६८ टक्के) पाणीसाठा झाला होता. जिल्ह्यातील धरणांच्या पाणलोटक्षेत्रात पावसाने उघडीप दिली असल्याने धरणांमध्ये येणाऱ्या पाण्याची आवक घटली आहे.

राज्यातील सर्वांत मोठे धरण असलेल्या उजनी धरणांमध्ये १८.१२ टीएमसी (३४ टक्के) उपयुक्त पाणीसाठा झाला आहे. उजनीतील अचल साठा विचारात घेता उजनीमध्ये ८१.७७ टीएमसी म्हणजेच एकूण क्षमतेच्या ७० टक्के पाणीसाठा झाला आहे. पाऊस थांबला असला तरी पाणलोट क्षेत्रात सुरू असलेल्या धरणांमधून पाण्याचा विसर्ग होत असल्याने उजनी आणि घोड या धरणांच्या पाणीपातळीत वाढ होत आहे.

जिल्ह्यातील खडकवासला, पानशेत, आंद्रा आणि कलमोडी ही धरणे ‘ओव्हरफ्लो’ झाली आहेत उर्वरित बहुतांशी धरणात ८० टक्क्यांहून अधिक पाणीसाठा झाला आहे. धरणांचा सांडवा आणि कालव्यातून पाणी सोडण्यात येत आहे. यात टेमघर धरणातून ६००, पानशेतमधून ६२०, खडकवासलामधून १६४४, पवना धरणातून १४१३, चासकमान धरणातून ५७५, गुंजवणीमधून ४७४ आणि वीर धरणातून २३७७ क्युसेक वेगाने पाण्याचा विसर्ग सुरू आहे.

जिल्ह्यातील धरणांचा पाणीसाठा (टीएमसीमध्ये) कंसात टक्केवारी : टेमघर २.५३ (६८), वरसगाव १०.०६(७८), पानशेत १०.६२ (९८), खडकवासला १.९७ (१००), पवना ८.२२ (९७), कासारसाई ०.५१ (९०), मुळशी १६.५१ (८९), कलमोडी १.५१ (१००), चासकमान ७.३९ (९८), भामा अासखेड ६.२२ (८१), आंद्रा २.९२ (१००), वडीवळे ०.९३ (८७), गुंजवणी २.२२ (६०), भाटघर १९.८९ (८५), नीरा देवघर ९.९६ (८५), वीर ९.०७ (७५९६), नाझरे ०.०३ (६), माणिकडोह ३.२२ (३२), ४.२३ (४२), वडज ०.६३ (५४), डिंभे १०.४७ (८४), घोड १.९७ (३६).