नागपूर विभागातील प्रकल्पात  उरला १० टक्‍के जलसाठा

नागपूर  : विभागातील मोठ्या प्रकल्पांमध्ये अवघा १० टक्‍के साठा उरल्याने येत्या काळात भीषण पाणीसंकटाचा सामना नागरिकांना करावा लागण्याची शक्‍यता वर्तविली जात आहे. विभागात १८ मोठे प्रकल्प आहेत. जिल्ह्यातील १९ गावांत सध्या टॅंकरने पाणीपुरवठा सुरू आहे. 

कमी पावसामुळे नागपूर जिल्ह्यातील तोतलाडोह व पेंच नवेगाव खैरी या दोन्ही प्रकल्पांमध्ये फक्‍त ६७.४४२ दलघमी इतका पाणीसाठा उरला आहे. पिण्याच्या पाण्यासह रोज १.३० दलघमी पाणी वापर असल्यामुळे दहा जूनपर्यंतच पुरेल इतकेच पाणी या प्रकल्पात आहे. परिणामी मॉन्सून लांबल्यास नागपूरकरांवर पाण्यासाठी भटकंतीची वेळ येणार आहे.

नागपूर विभागातील सर्वात मोठ्या प्रकल्पांपैकी एक असलेल्या तोतलाडोह प्रकल्पाची एकूण क्षमता १०१६.९ दलघमी आहे. यात केवळ २२ दलघमी म्हणजेच केवळ दोन टक्‍के पाणीसाठा उरला आहे. गोसे खुर्द प्रकल्प टप्पा दोनची क्षमता ७४० इतकी आहे. हा प्रकल्प पूर्णपणे कोरडा पडला आहे. वडगाव धरणात केवळ १ टक्‍के पाणी आहे. गडचिरोलीतील दिना प्रकल्पही कोरडा पडला आहे. त्यामुळे पाणीसंकट अधिक गडद झाले आहे. गेल्या वर्षी नागपूर जिल्ह्यात ३५ गावांमध्ये टॅंकरने पाणीपुरवठा होत होता. यावर्षी आतापासूनच १९ गावांमध्ये टॅंकरची सेवा सुरू झाली आहे. नागपूर जिल्ह्यात ४९० गावांमध्ये ८१२ बोअरवेल तयार करण्याचे प्रस्तावित होते. परंतू कंत्राटदारांचे सहकार्य न मिळाल्यामुळे ही कामे सुुरू होण्यास विलंब झाला. 

१९ गावांमध्ये टॅंकरने पाणीपुरवठा शहरालगतच्या गावांना पाणीटंचाईची झळ बसत असून आतापर्यंत १९ गावांना टॅंकरने पाणीपुरवठा होत आहे. यामध्ये बिडगाव, लावा, सुराबर्डी, बोथली, खापा, निपाणी, मोहगाव ढोले, गिदमगड, गोठणगाव, सुकळी कलार, वलनी, मौराळा, सीताखैरी, नीलडोह, कवडस, तांडा, खापरी रेल्वे, मोटाड, पांजरी, पिंडकापार, व्याहाड या गावांचा समावेश आहे. २४ टॅंकरने येथे पुरवठा होते. नीलडोह येथे सर्वाधिक ७८ फेऱ्या होत आहेत.