वाशीम : पावसामुळे झेंडू उत्पादकांचे नुकसान

वाशीम  ः परतीच्या पावसामुळे झेंडू पिकाचे अतोनात नुकसान झाले आहे. झेंडूची झाडे जमिनीवर पडल्याने फुलांना माती लागून त्याचा चिखल झाला. यामुळे झेंडूच्या दरांवर परिणाम होण्याची शक्यता असल्याने दिवाळीत या उत्पादकांना मोठा आर्थिक फटका बसण्याची चिन्हे आहेत. रिसोड तालुक्यात शेतकरी पारंपरिक पिकांसोबतच फुलशेतीला प्राधान्य देत असतात. गेल्या काही वर्षांत झेंडूची शेती या तालुक्यात विस्तारत आहे. या वर्षी दसऱ्याला झेंडू फुलांना अपेक्षित दर मिळाला नाही. आता सततच्या पावसाने फुलांचा दर्जा खालावला आहे. तोडणीला आलेली फुले खराब झाली आहेत. दिवाळीसाठी फुले तोडण्यापूर्वीच पावसामुळे झाडे कोलमडली. फुले जमिनीला लागल्याने त्यावर माती चिकटली. यामुळे फुलांचे नुकसान झाले. 

माझ्याकडे सहा एकर शेती आहे. एक एकरात झेंडूची लागवड केली होती. आमच्या गावात १०० पेक्षा अधिक शेतकऱ्यांनी दीडशे एकरावर झेंडूची लागवड केली आहे. मतमोजणी झाल्यानंतर आम्ही २५ ऑॅक्टोबरला फुलांची तोडणी करणार होतो. वाहतुकीसाठी वाहनही सांगितले होते. परंतु, रात्री झालेल्या पावसाने झेंडू पडला आहे. फुले पाणी व मातीने खराब झाली. - रामदास विठ्ठल चुनडे,  एकलपूर, ता. रिसोड जि. वाशीम