दावरवाडी परिसरात गारपिटीने फळबागांचे नुकसान

दावरवाडी, जि. औरंगाबाद : नांदर (ता. पैठण) परिसरात बुधवारी (ता. २५) पुन्हा सायंकाळी साडे सहा ते रात्रीच्या दहापर्यंत झालेल्या वादळी वाऱ्यासह गारपिटीच्या पावसाने फळबागांचे प्रचंड नुकसान झाले. तर इतर पिके पूर्णपणे वाया गेल्याने शेतकरी हवालदिन झाले आहेत.

बुधवारी (ता. २५) रात्री आलेल्या गारपिटीने परिसरातील मोसंबी, संत्रा, डाळिंब या फळबागांचे प्रचंड नुकसान झाले. तसेच ज्वारी, उन्हाळी बाजरी, गहू, हरभरा आदी पिके भिजून आडवी झाली आहेत. शेतकरी दिनकर सुखदेव सोनवणे यांची नांदर शिवारात गट नं (८६) मधील संत्र्याची दोनशे झाडांची फळबाग आहे. दोन चार दिवसांत ते संत्रे तोडूण विक्रीला घेऊन जाणार होते. परंतु गारपिटीसह वादळी पावसामुळे झाडावरील संत्र्याच्या फळांची गळती होऊन, झाडे देखील मोडली. यामुळे या शेतकऱ्याचे जवळपास पाच लाख रूपयांचे नुकसान झाले आहे. 

दुसरे शेतकरी अण्णासाहेब गवारे यांचा गट नं.(२१०) मध्ये दोन एकरांत शेवग्याच्या २००० झाडांची लागवड केलेली आहे. त्या झाडांचे ही या वादळी वाऱ्यात नुकसान झाले. यामध्ये सुमारे साठ टक्के शेंगांनी लगडलेली झाडे मोडून जमिनदोस्त झाली आहेत. सध्या शेवग्याच्या शेंगांना बाजारात ४० ते ५० रूपये किलोचा भाव असल्याने हातात आलेले लाखो रुपयांचे पीक वाया गेल्याने शेतकऱ्यावर आर्थिक संकट ओढवले आहे.

वादळी वाऱ्यासह गारपिटीने नुकसान झालेल्या फळपिकांचे व रब्बीच्या नुकसानग्रस्त पिकाची पाहणी तलाठी आर. पी. सोनवणे यांनी थेट शेतावर जाऊन केली. पिकांचे महसूल प्रशासनाने तात्काळ पंचनामे करून नुकसान भरपाई द्यावी, अशी मागणी शेतकरी अर्जून काळे, राजेंद्र गवारे, यशवंत राऊत, दीपक काळे, बाळासाहेब खुळे आदींनी केली आहे.