चांद्यात फ्लॉवरच्या निकृष्ट बियाण्यांमुळे नुकसान

नगर : तेलंगण राज्यातील एका बियाणे कंपनीचे फ्लॉवरचे बियाणे खरेदी करून लागवड केली. मात्र, ते बियाणे निकृष्ट दर्जाचे असल्याने फ्लॉवर पीक आलेच नाही. त्यामुळे चांदा (नेवासा) येथील काही शेतकऱ्यांचे लाखो रुपयांचे नुकसान झाले. याबाबत चौकशी करून कृषी विभागाचे अधिकारी, गुणनियंत्रण पथक, बियाणे विक्रेत्यावर कारवाई करावी, संबंधित कंपनीच्या विक्रीला महाराष्ट्रात बंदी घालावी, अशी तक्रार शेतकऱ्यांनी केली. याशिवाय महाराष्ट्र शेतकरी मराठा महासंघाने कृषिमंत्री दादा भुसे यांच्याकडे लेखी स्वरूपात मागणी केली.

जिल्ह्यामधील चांदा (ता. नेवासा) येथील काही शेतकरी सातत्याने भाजीपाल्याचे उत्पादन घेतात. यंदा साधारण दोन ते तीन हजार शेतकऱ्यांनी फ्लॉवर लागवड करण्यासाठी तेलंगण राज्यातील बियाणे कंपनीच्या फ्लॉवरची बियाणे नगर येथील दुकानातून खरेदी करून त्याची लागवड केली. मात्र, निर्धारित काळात लागवड केलेल्या फ्लॉवरच्या झाडाला पीकच आले नाही. त्यानंतर निकृष्ट व बनावट बियाण्यांमुळे असा प्रकार झाला. लाखो रुपयांचे नुकसान झाल्याची तक्रार संबंधित शेतकऱ्यांनी कृषी विभागाकडे केली. मात्र, कृषी विभागाने फारसे गांभीर्याने घेतले नाही. 

दरम्यान, महाराष्ट्र शेतकरी मराठा महासंघाच्या पदाधिकाऱ्यांनी पीकपाहणी केल्यानंतर शेतकऱ्यांचे मोठे नुकसान झाल्याचे निदर्शनास आले. त्यानंतर महासंघाच्या प्रदेशाध्यक्षांनी कृषिमंत्री दादा भुसे यांना निवेदन देऊन कारवाईची मागणी केली. बनावट बियाणे, कीटकनाशकांची सर्रास विक्री होत असताना जिल्हा अधीक्षक कृषी अधिकारी, जिल्हा परिषदेचे कृषी विकास अधिकारी तपासणी करीत नसल्याचे दिसून येत आहे. चांदा येथील शेतकऱ्यांच्या नुकसानीला कारणीभूत सर्व बाबींची आणि अधिकाऱ्यांची चौकशी करून कृषी विभागाचे अधिकारी, गुणनियंत्रण पथक, बियाणे विक्रेत्यावर कारवाई करावी, संबंधित कंपनीच्या विक्रीला महाराष्ट्रात बंदी घालावी, अशी मागणी महासंघातर्फे भुसे यांच्याकडे करण्यात आली. 

योग्य कारवाई होणार

दरम्यान, पीक आले नसल्याबाबत शेतकऱ्यांनी तक्रारी केलेल्या आहेत. त्याची तालुका कृषी अधिकारी व उपविभागीय कृषी अधिकाऱ्यांचे पथक तपासणी करत आहे. योग्य ती कारवाई होईल, असे जिल्हा अधीक्षक कृषी अधिकारी शिवाजी जगताप यांनी सांगितले.