वेतोरेतील दहा हेक्टरवरील कणगरचे नुकसान

सिंधुदुर्ग : जुलै, ऑगस्टमधील अतिवृष्टी आणि त्यानंतरच्या पावसामुळे जिल्ह्यातील वेतोरे (ता. वेंगुर्ला) परिसरातील दहा हेक्टरवरील कणगरचे नुकसान झाले आहे. यामुळे शेतकऱ्यांमध्ये चिंतेचे वातावरण असून, ते आता मदतीच्या प्रतीक्षेत आहेत.

वेंगुर्ला तालुक्यातील वेतोर या गावातील तरुणांचा मिश्रशेतीवर भर असतो. खरीप हंगामात या गावात भाजीपाल्यासोबत, चिबुड, कणगरची लागवड केली जाते. चिबुड पिकांचे जुलै, ऑगस्टच्या अतिवृष्टीतच नुकसान झाले. वेतोरे परिसरात सुमारे दहा हेक्टर क्षेत्र कणगर लागवडीखाली आहे. शेकडो शेतकरी दहा गुंठे, तर काही त्याहून अधिक कणगरची लागवड करतात. कणगरला गोव्यात मोठी मागणी आहे. साधारणपणे प्रतिकिलो कणगरला ६० रुपये दर मिळतो.

गणेशोत्सवानंतर हे पीक तयार होते. एक गुंठा क्षेत्रातून शेतकऱ्याला ३०० किलो कणगर मिळते. त्याला सरासरी ६० रुपये दर मिळतो. त्यामुळे प्रतिगुंठा १८ हजार रुपये उत्पादन होते. प्रतिगुंठ्याला सरासरी ११ हजार ५०० रुपये खर्च येतो. साधारणपणे या तीन महिन्यांत शेतकरी ६० ते ६५ हजार रुपये मिळवितो. ज्यांचे क्षेत्र मोठे आहे, ते अधिक नफा मिळवितात. १ कोटी ८० लाखांची उलाढाल फक्त कणगरपासून होते. परंतु यावर्षी ६० टक्के नुकसान झाले.