सिन्नर तालुक्यात गारपिटीच्या तडाख्यात पिकांचे नुकसान 

नाशिक : सिन्नर तालुक्यातील पूर्व भागात दातली, तर दक्षिण भागात गोंदे, माळवाडी, चापडगाव परिसरात अवकाळी पावसासह झालेल्या गारपिटीमुळे गहू, हरभरा, कांदा, मका,भाजीपाला यांसह डाळिंब बागांचे मोठ्या प्रमाणावर नुकसान झाले आहे. त्यामुळे ‘कोरोना’च्या पार्श्वभूमीवर अडचणीत असलेला शेतकऱ्यांच्या अडचणीत वाढ होण्याची शक्यता आहे. 

अवर्षणग्रस्त सिन्नर तालुक्यातील शेतकरी मागील वर्षाच्या दुष्काळी परिस्थितीत होरपळला असताना खरिपातील पिकांची मोठ्या प्रमाणावर नासाडी झाली होती. त्यात आता रब्बी हंगामातील पिके चांगली काढणीसाठी आली असताना अवकाळीच्या तडाख्यात सापडली आहेत. दुपारनंतर साडेचारच्या दरम्यान अवकाळी वादळीवाऱ्यासह पाऊस सुरू झाला व त्यानंतर गारपीट झाली. या गारा सुपारीच्या आकाराच्या असल्याचे येथील शेतकऱ्यांनी सांगितले. 

त्यामुळे काढणीसाठी आलेल्या पिकांचे नुकसान झाले. मृगबहारासाठी धरलेल्या डाळिंब बागांचे मोठे नुकसान झाले आहे. प्रामुख्याने गहू, हरभरा, भाजीपाला पिके जमीनदोस्त झाली. काढणीस आलेल्या कांद्याची पात व उन्हाळ मक्याची पाने तुटून पडली. मोठ्या अडचणीत असलेला शेतकरी या नुकसानीमुळे आर्थिक कोंडीत सापडण्याची चिन्हे आहेत. त्यामुळे झालेल्या नुकसानीचे पंचनामे होऊन शासनाकडून तातडीने मदत मिळावी व दिलासा द्यावा, अशी मागणी येथील शेतकऱ्यांनी केली आहे.

सटाणा तालुक्यात अवकाळी पावसासह गारपीट  निताने, बिजोते, आखतवाडे व भुयाने परिसरात तुरळक पाऊस तर थोडीफार गारपीट झाली. त्यामुळे वर्षभर सुरू असलेला निसर्गाच्या लहरीपणाचा फटका कायम आहे.त्यामुळे काढलेला कांदा झाकण्यासाठी शेतकऱ्यांची धावपळ झाली.