कोल्हापूर जिल्ह्यातील धरणे निम्मी भरली 

कोल्हापूर : जिल्ह्यात पावसाचा जोर कमी झाला असला तरी बहुतांशी धरणे पन्नास टक्केपर्यंत भरली आहेत. राधानगरी धरणात आजअखेर ५.९१ टीएमसी पाणीसाठा आहे. कोदे लघुप्रकल्प व जांबरे मध्यम प्रकल्प पूर्ण क्षमतेने भरले आहेत. 

इतर धरणांमध्ये तुळशी २.०२, वारणा १९.७५, दूधगंगा १०.५४, कासारी १.७८, कडवी १.८७, कुंभी १.६२, पाटगाव २.२७, चिकोत्रा ०.७५ टीएमसी, चित्री १.०९, जंगमहट्टी ०.८८, घटप्रभा १.५६, जांबरे ०.८२, कोदे (ल. पा.) ०.२१ टीएमसी पाणीसाठा आहे. कोयना धरणात ४७.६४ टीएमसी तर अल्लमट्टी धरणात ९९.९०५ इतका पाणीसाठा आहे. 

गेल्या दोन दिवसांपासून धरणक्षेत्रातही पावसाचा जोर ओसरल्याने दोन दिवसांपासून धरणातील पाणी धीम्या गतीने वाढत आहे. गेल्या दहा ते बारा दिवसांत धरणांच्या पाणीसाठ्यात चांगली वाढ झाल्याचे पाटबंधारे विभागाच्या सूत्रांनी सांगितले. अद्यापही पाटबंधारे विभागाच्या नियोजनानुसार जोरदार पाऊस नसल्याने धरणे तातडीने भरण्याची शक्‍यता कमी असल्याचे विभागाच्या सूत्रांनी सांगितले. सलग एक दोन दिवस पाऊस पडून पुन्हा तीन चार दिवसांची विश्रांती असे स्वरूप पावसाचे असल्याने गतीने धरणे भरण्याची प्रकिया होत नसल्याची माहिती पाटबंधारे विभागाच्या सूत्रांनी दिली. 

जो पर्यंत ८० टक्क्‍यांहून अधिक धरणे भरणार नाहीत तोपर्यंत कोणत्याही धरणांतून जादाचे पाणी सोडले जाण्याची शक्‍यता कमी आहे. जे लघुपाटबंधारे प्रकल्प पूर्ण भरले आहेत. त्यांच्या सांडव्यावरुन होणारा विसर्ग तेवढाच सुरू आहे. दूधगंगा, वारणा या मोठ्या धरणांवरील विसर्ग सुरू करण्यात आला नाही. पावसात संततधार पणा नसल्याने आम्ही अजूनही पाणी सोडण्याबाबत नियोजन केले नसल्याचे पाटबंधारे विभागाने सांगितले. 

मंगळवारी (ता. १६) सकाळपर्यंत नद्यांना आलेला पूर ओसरत असून सध्या केवळ बारा बंधारे पाण्याखाली आहेत. चार दिवसांपूर्वी तब्बल ७० बंधारे पाण्याखाली गेले होते. पाणी ओसरल्याने या बंधाऱ्यावरुन होणारी वाहतूक पूर्ववत झाली आहे.