नाशिक जिल्ह्यातील धरणसाठा ८३ टक्क्यांवर

नाशिक : जिल्ह्यातील ऑगस्ट महिन्याच्या सुरुवातीपासून सुरू असलेल्या मुसळधार पावसामुळे जिल्ह्यातील धरणांमधील पाणीसाठा ८३ टक्क्यांवर पोहोचला आहे. मागील आठच दिवसांत धरणांतील जलसाठा झपाट्याने वाढला आहे. मागील वर्षी याच कालावधीत ५९ टक्के पाणीसाठा होता. याच तुलनेत या वर्षी धरणसाठ्यात २४ टक्क्यांनी अधिक पाणी जमा झाले आहे. जिल्ह्यातील १७ प्रकल्पांमधील पाणीसाठा ९० टक्क्यांहून अधिक झालेला आहे. त्यामुळे जिल्ह्यात पिण्याच्या पाण्याचा व सिंचनाचा प्रश्‍न सुटण्यास मदत होणार आहे. जिल्ह्यातील १९ प्रकल्पांमधून पाण्याचा विसर्ग केला जात आहे. जिल्ह्यातील काही धरणांमधील पाणीसाठा गतवर्षाच्या तुलनेत वाढला आहे. त्यात प्रामुख्याने, पालखेडमध्ये मागील वर्षी २२ टक्के साठा होता. यंदा तो ७० टक्क्यांवर गेला आहे. ओझरखेड येथील साठाही मागील वर्षी ५१ टक्के होता तो १०० टक्के झाला आहे. तिसगाव येथील साठा मागील वर्षी २० टक्के होता यंदा त्यात लक्षणीय वाढ होत ८० टक्क्यांवर जाऊन पोहोचला आहे. जिल्ह्यातील धरणांमधील जलसाठ्यात लक्षणीय वाढ झाल्याने प्रशासनाला पाणीपुरवठा करताना येणाऱ्या अडचणी सुटण्यास मदत होणार आहे.  दोन धरणे कोरडीच  जिल्ह्यात नागासाक्या व माणिकपुंज या प्रकल्पांत एक थेंबही पाणीसाठा शिल्लक नाही. त्यामुळे नांदगावची परिस्थिती गंभीर बनत चालली आहे.  जिल्ह्यातील धरणसाठा स्थिती