पुणे जिल्ह्यातील धरणांत ७८ टीएमसी पाणीसाठा

पुणे : गेल्या दीड महिन्यापासून उन्हाच्या झळा तीव्र झाल्या आहेत. धरणातील पाण्याची मागणी वाढू लागली आहे. धरणातील उपलब्ध असलेल्या पाणीसाठ्याची पातळी वेगाने  कमी होत आहे. आतापर्यंत सुमारे १३४.९२ टीएमसी पाणीसाठ्याचा वापर झाला असून, अजूनही ७८.२१ टीएमसी पाणीसाठा उपलब्ध आहे. येत्या काळात उन्हाचा चटका वाढल्यास आणखी वाढण्याची शक्यता जलसंपदा विभागाच्या सूत्रांनी वर्तविली आहे.

 पुणे जिल्ह्यातील एकूण धरणात गेल्या वर्षी २१३.१३ टीएमसी एवढी उपयुक्त पाणी साठा होता. यामध्ये उजनी धरणाचाही समावेश आहे. राज्यासह, पुणे जिल्ह्यातही  फेब्रुवारीच्या अखेरीपासून उन्हाचा पारा हळूहळू वाढू लागला. त्यामुळे धरणातील पाण्याची मोठ्या प्रमाणात गरज भासू लागली. उजनी धरण वगळता उर्वरित सर्वच धरणे पुणे जिल्ह्याच्या पश्चिम भागात आहे. त्यातच पुणे व पिंपरी शहराची वाढती लोकसंख्या विचारात घेतली असता या दोन्ही शहरांना खडकवासला, चासकमान,  पवना या धरणातून पाण्याचा पुरवठा होतो. या शिवाय पूर्वेकडील पुरंदर, दौंड, बारामती, इंदापूर, खेड, शिरूर, जुन्नर आणि आंबेगाव या पूर्व भागातील तालुक्यांना पश्चिमेकडील धरणातून शेतीसाठी पाण्याचा विसर्ग सोडला जातो.

सध्या पिंपळगाव जोगे, डिंभे, घोड, चासकमान, खडकवासला, वीर, नाझरे, उजनी या धरणातून शेतीच्या उजव्या आणि डाव्या अशा दोन्ही कालव्यांना पाण्याचा विसर्ग सोडण्यात आलेला आहे. या शिवाय वडज, पवना, खडकवासला या धरणातून बंद जलवाहिनीद्वारे पाणीपुरवठा सुरू आहे. धरणात अजूनही मोठ्या प्रमाणात पाणीसाठा झाला असला तरी मे महिन्यात पाण्याची मागणी आणखी वाढणार आहे. धरणातील पाणीपातळी वेगाने कमी होत आहे. त्यामुळे नागरिकांनी पाण्याचा योग्य पद्धतीने वापर करण्याचे आवाहन जलसंपदा विभागाच्या सूत्रांनी केले. 

धरणनिहाय उपलब्ध असलेला पाणीसाठा (टीएमसी)  पिंपळगाव जोगे ०.१०, माणिकडोह ०.८५, येडगाव ०.६४, वडज ०.४७, डिंभे ५.६५, घोड १.०८, विसापूर ०.३३, कळमोडी ०.९८, चासकमान ३.१२, भामाआसखेड ३.९७, वडीवळे ०.३६, आंध्रा २.०८, पवना ३.९१, कासारसाई ०.२८, मुळशी ४.९६, टेमघर ०.४५, वरसगाव ६.४५, पानशेत ६.६०, खडकवासला ०.३६, गुंजवणी १.८८, नीरा देवधर ४.४१, भाटघर १०.३४, वीर ५.८६, नाझरे ०.२८, उजनी १२.५१, चिल्हेवाडी ०.२९.